ATU-da 2016/2017-ci tədris ilinin payız semestrinin imtahan sessiyasına start verilib.
ATU-nun rektoru, professor Gəray Gəraybəyli bu ərəfədə semestr imtahanlarının mütəşəkkil keçirilməsi, aşkarlıq, obyektivlik şəraitində aparılması ilə əlaqədar olaraq fakültə dekanlarına, kafedra və şöbə müdirlərinə müvafiq göstərişlər verib.
Qeyd edək ki, sessiyanın təşkili ilə bağlı rektor G.Gəraybəyli ATU üzrə 586/T saylı 04 noyabr 2016-cı il tarixli əmr imzalayıb. Əmrə əsasən, imtahanların təşkili ilə əlaqədar operativ qərargah yaradılıb. Bundan əlavə, 2016/2017-ci tədris ilinin payız semestri imtahanlarının təşkili ilə bağlı universitetdə dəfələrlə toplantı keçirilib, müzakirələr aparılıb. Həmçinin payız semestrinin imtahan sessiyasına hazırlıq, onun obyektivlik şəraitində keçirilməsi fakültə elmi şuralarında,kafedra əməkdaşları ilə tələbələrin birgə müşavirələrində də geniş müzakirə olunub.
Hazırda ATU-da imtahanlar davam edir. Bu semestrdə ATU-nun I müalicə-profilaktika fakültəsi üzrə - 1996, tibbi-profilaktika fakültəsi üzrə - 469, II müalicə-profilaktika fakültəsi üzrə - 2056 tələbə, stomatologiya fakültəsi üzrə -752 tələbə, əczaçılıq fakültəsi üzrə - 377, hərbi tibb fakültəsi üzrə isə - 479 tələbə imtahan verəcək.
Onu da bildirək ki, ATU-da imtahanlar dekabrın 29-dan start götürüb və cari ilin fevral ayının 1-nə qədər davam edəcək. İmtahanları istənilən valideyn gəlib şəxsən izləyə bilər. Bunun üçün universitet rəhbərliyi tərəfindən hər cür şərait yaradılıb.
Xəbər xidməti
