"Bir qisim tələbə axşam növbəsində işləməli olur, ya da işlədiyinə görə dərsə davamiyyəti zəifləyir"
Azərbaycanda ödənişsiz əsaslarla təhsil alan tələbələrə təhsil ehtiyacları üçün nəzərdə tutulan kreditlər verilə bilər. "Maarifçi" Tələbə Kredit Fondunun məlumatına əsasən, ödənişsiz əsaslarla təhsil alan tələbələrə təhsil haqqı kreditləri istisna olmaqla, digər təhsil ehtiyacları üçün nəzərdə tutulan kreditlər şamil oluna bilər.
Fonddan qeyd edilib ki, "Maarifçi" Tələbə Kredit Fondunun imkanları məhdud olduğundan və eyni zamanda bakalavrlar təhsil haqqı kreditinə daha çox ehtiyac duyduğundan, növbəti elan sessiyası zamanı bakalavr pilləsində təhsil alan tələbələr üçün kreditlərin ayrılması nəzərdə tutulur.
Fond tələbələrə yataqxana haqqı, tədris materialları, elmi tədqiqatlar, araşdırma və s. kimi ehtiyac və təyinata görə kreditlər təqdim etməyi planlaşdırır: "Amma hazırda təhsil haqqı kreditləri daha prioritet hesab olunur. Çünki tələbat əsasən bu istiqamət üzrədir. Təxmin edirik ki, bu təyinat üzrə tələbələrin ehtiyacları növbəti illərdə kifayət qədər ödəniləcək və fond digər istiqamətlərdə də kreditlərin təqdim olunması planını həyata keçirməyə başlayacaq. Amma hələlik digər kredit növləri üzrə şərtlər məlum deyil".
Xatırladaq ki, hazırda bakalavr səviyyəsi üzrə ödənişli əsaslarla təhsil alan tələbələrə təhsil haqqının ödənilməsi üçün kreditlər verilir. Tələbələrə kreditlər standart paket olaraq 8 %-lə, güzəştli paket olaraq isə 6 %-lə təklif olunur. Güzəştli paket üçün kreditin qaytarılma müddəti 120 ay, standart paket üçün 60 aydır. Fond tələbədən təhsil müddəti və güzəşt müddəti ərzində faiz borcunun ödənilməsini tələb etməyəcək. Bu müddət ərzində yığılan faiz borcu əsas məbləğə əlavə olunacaq. Tələbələr kreditləri təhsilini başa vurduqdan, işlə təmin olunduqdan sonra ödəməyə başlayacaq.
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, ödənişsiz əsaslarla təhsil alan tələbələrə təhsil kreditinin verilməsi uzun müddət həllini gözləyən problemlərdən biri idi: "Təhsil kreditinin ali təhsil alan bütün tələbələrə verilməsi sevindiricidir. Bəllidir ki, bu gün ödənişsiz ixtisaslarda təhsil alan tələbələrin sosial durumu heç də ürəkaçan vəziyyətdə deyil. Bir qisim tələbə axşam növbəsində işləməli olur, ya da işlədiyinə görə dərsə davamiyyəti zəifləyir. Bu faktlar sirr deyil. Tələbələrin dərsdən yayınması onların təliminə mənfi təsir göstərir. Sosial durumu ağır olan tələbələrə təhsil xərclərinin ödənilməsi üçün təhsil kreditlərinin verilməsi onların probleminin həllində mühüm addımdır".
Həmsöhətimizin fikrincə, tələbələrə təhsil kreditinin verilməsi təlimin yüksəlməsinə səbəb olacaq. Tələbələrin tək istəyi ixtisası üzrə biliklərə yiyələnib gələcəkdə peşəkar mütəxəssis kimi yetişmək olacaq.
Günel CƏLİLOVA
