Azərbaycanın ilk mobil operatoru və aparıcı mobil internet provayderi "Bakcell" şirkətinin sponsorluğu, "Uğur Akademiyası" və "UAFA"nın təşkilatçılığı ilə xüsusi qayğıya ehtiyacı olan uşaqların valideynləri üçün maarifləndirici seminar keçirilib.
Seminarın keçirilməsində əsas məqsəd sağlamlıq imkanları məhdud olan uşaqların valideynlərinə dəstək olmaq, məsləhət vermək və məlumatlandırmaq idi. Spikerlər, bu sahə üzrə geniş təcrübəyə malik mütəxəssislər- Ülviyyə Mirzəyeva və Zəhra Xələflinin iştirakı ilə əlilliyi olan uşaqlar və valideyn münasibətləri, onlara qarşı cəmiyyətdə mövcud olan yanaşmalar, stiqmalar, həmçinin, bu problemlərin aradan qaldırılmasının həlli yolları müzakirə olunub.
Tədbirə, həmçinin, paralimpiya çempionu İlham Zəkiyev və dünya çempionu Aynur Məmmədova da qatılıb. Onların çox maraqlı həyat hekayələri nəinki tədbirdə iştirak edən əlilliyi olan uşaqlar və onların valideynləri üçün, eyni zamanda əlilliyi olmayan insanlara da böyük motivasiya oldu. Çempionlar seminar iştirakçılarına əlilliyin baryer olmadığını və insanın öz əzmi sayəsində, əlilliyinin olub-olmamasından asılı olmayaraq, həyatda istədiyi mövqeyə sahib olmasının mümkün olduğu barədə danışıb.
Tədbirin sonunda spikerlər onlara ünvanlandırılan sualları cavablandıraraq, ehtiyacı olan valideynlərə müvafiq məsləhətlər verib.
