"Uşaq problemlərinin həllinə dəstək olmaq məqsədilə Uşaq Strategiyasının hazırlanması sevindiricidir"
"Əfsuslar olsun ki, uşaq əməyi, təhsildən yayınma, erkən nikahlar, selektiv abortlar problem olaraq qalmaqdadır. Boşanan qadınlar yaşayış yerindən, mülkiyyət hüququndan məhrum edilir, uşaqlar üçün təyin edilən alimentlər ödənilmir".
Bunu Ailə, Qadın və Uşaq Problemləri üzrə Dövlət Komitəsinin sədri Hicran Hüseynova rəhbəri olduğu komitənin kollegiya iclasında çıxışı zamanı deyib. O bildirib ki, Uşaq Strategiyası hazırlanaraq rəy üçün Nazirlər Kabinetinə təqdim olunub, eyni zamanda Uşaq Məcəlləsinin hazırlanması istiqamətində iş aparılır.
Dövlət Komitəsinin sədri qeyd edib ki, məişət zorakılığı ilə bağlı komitə tərəfindən məlumat bankı yaradılıb, baş vermiş məişət zorakılıqları araşdırılır.
Məsələ barədə fikir bildirən "Vəfa" Sosial İctimai Birliyinin sədri Fatimə Hacıbəyli "Bakı-Xəbər"ə açıqlamasında bunları dedi: "Uşaq Strategiyasının hazırlanması sevindiricidir. Strategiyada uşaqların və ailələrin yaşadığı əsas problemlər qeydə alınmalıdır. Bu gün uşaq əməyindən istifadə olunur. Bu barədə danışmaq acı olsa da, azyaşlı uşaqların şəhərin istənilən ərazisində əlində salfet satdığını və ya diləndirildiyini görə bilərik. O uşaqların çöldə deyil, məktəbdə olması vacibdir".
Həmsöhbətimiz onu da bildirdi ki, bu gün uşaqlar ən çox ailədaxili münaqişələrdən əziyyət çəkir: "Ailələrdə yaşanan diskomfort şərait, istər-istəməz, uşaq psixologiyasına öz təsirini göstərir. Valideynlərin mütəmadi dalaşması uşaqlarda aqressiya hissinin yaranmasına səbəb olur. Bu tip ailələr nəzərətə götürülməlidir. Həmin ərazinin icra nümayəndələri və ya bələdiyyə ailəni nəzarətə götürməlidir ki, ailədə yaşanan istənilən xoşagəlməz hal uşağa təsir etməsin".
F.Hacıbəylinin sözlərinə görə, bu gün uşaqların ən çox zərər çəkdiyi problemlərdən biri də məişət zorakılığıdır: "Bu gün dövlət tərəfindən məişət zorakılığı, selektiv abortların qarşısının alınması üçün mütəmadi maarifləndirmə işləri aparılır, qanunvericilik təkmilləşdirilir. Son illər ərzində uşaq hüquqları üzrə hüquqi aktlarda, Ailə Məcəlləsində dəyişikliklər edilib. Lakin buna baxmayaraq, bu gün bizdə də erkən nikahlar, uşaqlara qarşı zorakılıq, təhsildən yayınma, selektiv abortlar kimi problemlər var. Bunlarla mübarizə üsullarında ildən-ilə təkmilləşdirmə işləri aparılır. Əsas məqsəd problemlərin həlli və uşaqların inkişafına dəstək olmaqdır. Tərtib olunan Uşaq Strategiyasında bu kimi məsələlərə toxunulub. Gələcəyimiz sayılan uşaqların problemləri yaxın illər ərzində tam olaraq həll olunar".
Günel CƏLİLOVA
