Bahadur Bilalov: "Turist axınını nəzərə alaraq, müxtəlif regionlarda turizm zonasının yaradılması müsbət addım kimi qəbul olunmalıdır"
Xəbər verildiyi kimi, Azərbaycanda üç turizm-informasiya mərkəzi yaradılıb. Bu, Nazirlər Kabinetinin "Qəbələ, İsmayıllı və Bərdə turizm-informasiya mərkəzlərinin yaradılması və Azərbaycan Respublikası Nazirlər Kabinetinin 2014-cü il 17 iyun tarixli, 196 nömrəli Qərarı ilə təsdiq edilmiş "Azərbaycan Respublikası Mədəniyyət və Turizm Nazirliyinin strukturuna daxil olmayan, tabeliyindəki qurumların Siyahısı"nda dəyişikliklər edilməsi barədə" Qərarında əksini tapıb.
Mədəniyyət və Turizm Nazirliyinə yaradılan turizm-informasiya mərkəzlərinin saxlanması xərclərini hər il dövlət büdcəsinin mərkəzləşdirilmiş xərclərində həmin nazirlik üçün nəzərdə tutulmuş müvafiq vəsait dairəsində həyata keçirmək tapşırılıb. Turizm-informasiya mərkəzləri "Azərbaycan Respublikası Mədəniyyət və Turizm Nazirliyinin strukturuna daxil olmayan, tabeliyindəki qurumların Siyahısı"nda "Büdcədən maliyyələşdirilən qurumlar" bölməsinə daxil edilib.
Mövzu ilə bağlı fikir bildirən turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, turistlərin regionlara cəlb olunması üçün turizm-informasiya mərkəzlərinin yaradılmasının böyük əhəmiyyəti var: "Mərkəzin əsas işi ondan ibarətdir ki, regionda olan turizm obyektləri, bölgənin cəlbedici məkanları haqqında məlumatları toplayıb turistə çatdırsın. Demək olar ki, bütün dünya ölkələrində belə mərkəzlər var və onların işi turistləri məlumatlandırmaqdan ibarətdir. Turist axınını nəzərə alaraq, müxtəlif regionlarda turizm zonasının yaradılması müsbət addım kimi qəbul olunmalıdır. İlk dəfə 2005-ci ildə Bakı Turizm-İnformasiya Mərkəzi yaradılıb. Hazırda Qəbələ, İsmayıllı və Bərdə rayonlarında turizm-informasiya mərkəzləri yaradılıb. Bu mərkəzlərin sayının artması turist axınına təsir göstərəcək. Yaxşı olar ki, turizm baxımından cəlbedici regionlarımızın hamısında bu tip informasiya mərkəzləri yaradılsın".
Günel CƏLİLOVA
