Məhərrəm Zülfüqarlı: "Çöldə aparılan tədqiqat işlərinə görə verilən məbləğ indiki dövrdə qaneedici sayıla bilməz"
Xəbər verildiyi kimi, Azərbaycan Milli Elmlər Akademiyasının Coğrafiya İnstitutunun direktoru Ramiz Məmmədov bildirib ki, Nazirlər Kabineti çöl-tədqiqat, ekspedisiya işləri üçün ödənişlər haqqında yeni qaydalar hazırlayıb.
Onun sözlərinə görə, təsdiq olunmuş yeni qaydalara əsasən, çöldə tədqiqat işlərini aparmaq üçün elmi işçiyə 10 manat pul verilir: "Əlavə maşın tutulubsa, sürücüyə yanacağı da özündən olmaq şərti ilə yenidən 10 manat verilir. Bu gün kim 10 manata bütün günü çöldə işləyər? Hansı sürücü öz maşını və yanacağı ilə birlikdə bütün gününü çöl işlərinə sərf edər? Gələcəkdə bu sahədə işlərin uğurlu olması üçün maliyyə məsələlərinə yenidən baxılmalıdır. Bununla bağlı müvafiq təkliflər edərək dəyişikliklərin edilməsinə ehtiyac var".
R.Məmmədov onu da deyib ki, xarici qrantların alınması ilə də bağlı müəyyən problemlər var: "Qalib gələn alim xarici qrant hesabında olan maliyyəni ala bilmir. Nazirlər Kabineti yeni qayda qoyub ki, qrantlar Nazirlər Kabinetində qeydiyyatdan keçməlidir, icazə alınmalıdır. Yalnız bundan sonra fəaliyyətə başlamaq olar".
R.Məmmədova görə, belə hallar elm adamlarını işdən soyudur.
Deyilənlərə rəğmən, onu da nəzərə almaq lazımdır ki, dünyadakı məlum iqtisadi proseslər üzündən gələnilki büdcənin imkanları məhduddur. O üzdən, bu məqsədlə ayrılan vəsait elə də böyük deyil. Maraqlıdır, bəs ekspertlər buna necə yanaşır və optimal çıxış yolunu nədə görür?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, bu problem çoxdan var, amma bunu qismən həll etmək olar: "Böyük bir elmi işi oxumağa vaxt, istedad, savad lazımdır. Bunun müqabilində 10 manatın verilməsi çox kiçik məbləğdir. O cümlədən, çöldə aparılan tədqiqat işlərinə görə də verilən məbləğ indiki dövrdə qaneedici sayıla bilməz. Ancaq indi büdcənin imkanları məhdud olduğuna görə bu məqsədlə ayrılan vəsaiti artırmaq çətin məsələdir. Buna rəğmən, hesab edirəm ki, hər bir institut büdcədən ayrılan vəsaitlərdən əlavə, elmi işə, tədqiqata digər mənbələrdən vəsait cəlb etməyə çalışmalıdır. Müəyyən işlər görməklə, əlavə gəlir yerləri tapmaqla bu problemi həll etmək olar. Yoxsa, başqa cür mümkün deyil. Çalışmaq lazımdır ki, elmi tədqiqatlara ayrılan qrantların həcmi artırılsın. Bir sıra dünya ölkələrində sözügedən məsələ bu kimi metodlarla həll edilir".
Vidadi ORDAHALLI
