Zakir Əhmədov: "Könüllülərin buna xüsusi maraq göstərməsinin kökündə..."
Məlum olduğu kimi, Prezident İlham Əliyev Bakıda 1 saylı "ASAN kommunal" Mərkəzinin açılışında iştirak edib və Biləcəri stansiyasında səyyar "ASAN qatar"la tanış olub.
Mərasimdə çıxış edən ölkə başçısı sözügedən xidmətlə bağlı bir sıra məqamlara toxunub: "ASAN xidmət" təşəbbüsü də sosial xarakter daşıyır. Çünki bu, vətəndaşlara göstərilən xidmətdir. Vətəndaşlar bu xidmətdən istifadə edərək heç bir çətinlik çəkmirlər. Əslində, bu sistemin yaradılması ictimai xidmətlər və ictimai münasibətlər sahəsində bir inqilab idi. Bu, özlüyündə böyük bir irəliləyiş, böyük bir yenilikdir".
Prezident İlham Əliyev "ASAN xidmət"ə qoşulan könüllülərin fəaliyyətini xüsusi qiymətləndirib: "Əlbəttə ki, biz "ASAN xidmət"i könüllülər hərəkatından ayıra bilmərik. Bu da bir yenilikdir. "ASAN" yaranana qədər Azərbaycanda könüllülər hərəkatı olmamışdır. Biz könüllülər haqqında eşitmişdik. Ancaq könüllülər hərəkatı nədir, onu bilmirdik. Bu gün artıq bu hərəkat Azərbaycanda yaşayır. Mənə verilən məlumata görə, 10 min gənc artıq könüllü kimi "ASAN xidmət" mərkəzlərində işləyib və bu insanların bir çoxu bu gün müxtəlif vəzifələrdə, müxtəlif işlərdə ölkəmizin gələcək inkişafı üçün çalışırlar. Hazırda bütün bu mərkəzlərdə 700-dən çox könüllü fəaliyyət göstərir. İki il bundan əvvəl mən könüllülərin birinci toplantısında onlarla görüşmüşdüm.
Nəhayət, bu mərkəzlərin bir xüsusiyyəti də var ki, burada iş yerləri açılır".
Ümumilikdə, çoxsaylı insanın könüllü olaraq "ASAN xidmət"də çalışmağa maraq göstərməsinin, bunu dəstəkləməsinin kökündə nə dayanır? Məsələyə münasibət bildirən ekspert Zakir Əhmədovun fikrincə, bu, sözügedən sistemin çoxşaxəli üstünlüyündən xəbər verir: "Məsələ ondadır ki, "ASAN xidmət" dünyada analoqu olmayan üstün bir təsisatdır. Bu xidmətin parametrləri o qədər funksionaldır ki, nəticədə çoxsaylı gənc orada, könüllü də olsa, işləməyə maraq göstərir. Çünki ilk gündən "ASAN xidmət" özünü doğrultdu və cəmiyyətin böyük rəğbətini qazandı. Əksər ölkə vətəndaşı xidmətin rahatlığını öz həyatında hiss etməyə başladı. Bu da, nəticə etibarilə, vətəndaşların, xüsusən də gənclərin könüllü olaraq "ASAN xidmət" mərkəzlərində fəaliyyət göstərməsinə gətirib çıxardı. Onlar könüllü fəaliyyət göstərməklə həm də iş təcrübəsi qazanmış oldu. Nəticədə onlar digər sahələrdə özlərinə həm iş tapmaqda çətinlik çəkmədi, həm də, bir növ, təcrübə topladılar. Könüllülərin "ASAN xidmət"ə xüsusi maraq göstərməsinin gökündə məhz bu faktor dayanır". Vidadi ORDAHALLI
