Eyyub Hüseynov: "Görünüşünə aldanıb aldığımız qidaların yaratdığı allergiyanın ölümə..."
Bazarlarda görüntüsü ilə alıcının diqqətini özünə cəlb edən meyvələrə istənilən şəxs rast gələ bilər. Bu qidaların gözəl görünüşünə aldanıb onları alırıq. Alıcıların daha çox görünüşə üstünlük verdiyini bilən satıcılar meyvələri xüsusi bir maddə ilə silir ki, təmiz görünsün. Redaksiyamıza verilən məlumata əsasən, satıcılar meyvələri adi su ilə deyil, xüsusi maddə ilə silir. O maddənin də kimyəvi olduğu iddia olunur.
O da qeyd olunur ki, meyvələrə kimyəvi maddənin vurulmasının bir səbəbi də onların uzun müddət saxlanmasıdır. Məsələ ilə bağlı "Bakı-Xəbər"ə açıqlama verən Azad İstehlakçılar Birliyinin sədri Eyyub Hüseynov qeyd etdi ki, bazarda satılan meyvələrin əksəriyyəti xüsusi maddə ilə silinir. Onun sözlərinə görə, istehlakçılar tərəfindən məlum problemlə bağlı Birliyə dəfələrlə şikayət olunub: "Edilən şikayətlərdə qeyd olunur ki, parıltılı görünməsi üçün meyvələr xüsusi maddə ilə silinir. Meyvələrin maye formasında olan parafinlə silinməsinin səbəbi parıltılı görünməsi və istifadə müddətinin uzadılmasıdır. Beləliklə, meyvə gec xarab olur".
Həmsöhbətimiz onu da əlavə etdi ki, satıcılar ən çox alma, armud və heyvanı parafin adlanan maddə ilə silir: "İstənilən kimyəvi maddə insan sağlamlığına müxtəlif formada zərər vurur. Son vaxtlar qida mənşəli allergiyaların sayı artıb. Allergiyaların 50 %-i qida mənşəlidir. Bundan da ən çox uşaqlar əziyyət çəkir. İnsanlar da görünüşə aldanıb, bahalığın keyfiyyət göstəricisi olduğunu düşünərək bu qidaları alır. Görünüşünə aldanıb aldığımız qidaların yaratdığı allergiyanın ölümə səbəb olması isə qaçılmazdır. Bu sahəyə nəzarətin zəif olması təhlükənin ciddiliyindən xəbər verir".
Günel CƏLİLOVA
