Aytəkin Kamranqızı: "Uşaqları sevindirmək üçün nəzərdə tutulan bayram bağlamaları aidiyyəti qurumların icazəsi ilə xüsusi bir məkanda, müasir standartlara cavab verən şəkildə hazırlanmalıdır"
Qarşıdan Dünya Azərbaycanlılarının Həmrəyliyi Günü və uşaqların səbrsizliklə gözlədiyi Yeni il bayramı gəlir. Uşaqların Yeni il bayramını sevməsinin səbəblərindən biri Şaxta Babanın onlara guya hədiyyə gətirməsidir. Uşaqları bayram günündə sevindirmək üçün onlara şəhərin istənilən məkanında satılan bayram bağlamalarını alıb Şaxta Baba tərəfindən göndərildiyini deyirik.
Həmin bağlamalarda müxtəlif adda şirniyyatlar olur. Bu bağlamaların hansı şəraitdə hazırlandığı məlum deyil və içərisindəki məhsulların keyfiyyətli olması şübhə doğurur.
Qeyd edək ki, bağçalar və məktəblər bayram şənliyi keçirməyə hazırlaşır. Həmin şənliklərdə uşaqlara bayram bağlamaları təqdim olunacaq. Məlumatlara görə, o bağlamaları valideynlər "Sədərək" Ticarət Mərkəzinin topdansatış bölməsi deyilən yerdən alır. Orada bağlamaların qutuları ayrı satılır. Təbii ki, qutuların rənginə və bəzəyinə görə qiyməti dəyişir. "Sədərək" Ticarət Mərkəzindən bağlamalarla yanaşı, onun içərisinə qoyulacaq məhsullar da alınır. Yeni bağlamaların içərisində adətən 1-2 şokolad, peçenye, şar və müxtəlif növ heyvanların üz cizgilərini əks etdirən maska olur. Həmin məhsullar ayrı-ayrılıqda alınaraq bağlamaların içərisinə qoyulur. O məhsulların tərkibinin necə olması isə sual altındadır.
Ekspertlər təklif edir ki, bayram bağlamalarının hazırlanması mərkəzləşdirilmiş qaydada həyata keçirilsin.
Sosioloq Aytəkin Kamranqızı bizimlə söhbətində bildirdi ki, artıq neçə ildir uşaqlar üçün xüsusi qutularda bayram hədiyyələri satılır: "O hədiyyələrin necə və hansı şəraitdə hazırlanması bəlli deyil. Hədiyyə qutularının içərisində bəzən sağlamlıq üçün təhlükə törədən şirniyyatlara da rast gəlinir. Bağlamalara bəzən vaxtı ötmüş məhsulların qoyulduğu iddia olunur. Qutuların üzərində onun içərisində hansı şirniyyatların olduğu yazılsa da, heç birinin yararlılıq müddəti göstərilmir".
Həmsöhbətimizin sözlərinə görə, hədiyyə bağlamaları adətən uşaqların zövqünə oxşar şəkildə hazırlanır: "Uşaqlar üçün bağlamanın içərisində hansı məhsulun olması önəmli deyil, əsas formasının maraqlı dizaynda olmasıdır".
A.Kamranqızı təklif edir ki, uşaqları sevindirmək üçün nəzərdə tutulan bayram bağlamaları aidiyyəti qurumların icazəsi ilə xüsusi bir məkanda, müasir standartlara cavab verən şəkildə hazırlansın. Belə olarsa, hər kəs Yeni il hədiyyələrinin mərkəzləşdirilmiş qaydada hazırlanmasından xəbərdar olar.
Günel CƏLİLOVA
