"Hesab edirəm ki, bununla bağlı yeni təsisatın yaradılması bu yöndə görülən işlərə müsbət təsir göstərəcək"
Məlum olduğu kimi, Prezident İlham Əliyev Azərbaycanda turizmin inkişaf etdirilməsi ilə bağlı bir sıra tədbirlər haqqında fərman imzalayıb. Bu fərmanla "Azərbaycan Respublikasının Turizm Şurası haqqında Əsasnamə" və "Azərbaycan Respublikası Turizm Şurasının tərkibi" təsdiq edilir.
Mədəniyyət və Turizm Nazirliyinə ölkənin turizm potensialının daha da artırılmasını və beynəlxalq səviyyədə tanıdılmasını təmin edən "Milli Turizm Təbliğat Bürosu" publik hüquqi şəxsi üç ay müddətində yaratmaq və publik hüquqi şəxsin təsisçisinin "Publik hüquqi şəxslər haqqında" Azərbaycan Respublikası Qanununun 8.2-ci maddəsində nəzərdə tutulan səlahiyyətlərini həyata keçirmək tapşırılıb.
Müəyyən edilir ki, "Milli Turizm Təbliğat Bürosu" publik hüquqi şəxsin saxlanması və fəaliyyətinin təmin edilməsi xərcləri onun fəaliyyətindən əldə edilən gəlirlər (o cümlədən aldığı kreditlər, qrantlar, habelə işlərin görülməsindən, xidmətlər göstərilməsindən daxilolmalar və s.) hesabına maliyyələşdirilir.
Müvafiq qurumlara bu fərmandan irəli gələn vəzifələrin icrası ilə bağlı Azərbaycan Respublikasının Turizm Şurasına lazımi kömək göstərilməsini və onun müraciəti əsasında zəruri məlumatların təqdim olunmasını təmin etmələri tapşırılıb.
Son dövrlər turizmin daha da inkişaf etdirilməsi və turizm fəaliyyəti üçün əlverişli şəraitin yaradılması, ölkədə turizmin müasir tələblərə uyğun şəkildə təşkili, xidmət keyfiyyətinin artırılması, regionda, eləcə də dünyada Azərbaycanın turizm məhsulunun rəqabət qabiliyyətinin yüksəldilməsi istiqamətində tədbirlər həyata keçirilir. Bütün bunların fonunda, Milli Turizm Təbliğat Bürosunun yaradılmasını ekspertlər necə dəyərləndirir? Məsələyə münasibət bildirən ekspert Məhərrəm Zülfüqarlının fikrincə, bu, turizmin təbliği baxımından müsbət addımdır: "Biz Azərbaycanda turizm sektorunun inkişaf etdirilməsini qarşımıza məqsəd qoymuşuqsa, bununla bağlı bir sıra kompleks tədbirlərin görülməsi lazımdır. Bunlardan biri turistlərə göstərilən xidmət səviyyəsinin artırılmasıdırsa, o birisi qiymətlərin münasib olmasıdır. Bütün bunlarla yanaşı, vacib olan məqamlardan biri də Azərbaycanda mövcud turizm potensialının dünyada təbliğ edilməsidir. Bu baxımdan hesab edirəm ki, Milli Turizm Təbliğat Bürosunun yaradılması bu işə töhfə verə bilər. Bunun sayəsində həm yerli, həm də xarici turistlər ölkənin turizm potensialı ilə tanış olacaq. Ölkəyə çoxsaylı turist cəlb etmək üçün turizm potensialının dünyaya tanıdılması lazımdır. Hesab edirəm ki, bununla bağlı yeni təsisatın yaradılması bu yöndə görülən işlərə müsbət təsir göstərəcək".
Vidadi ORDAHALLI
