Ərşad Hüseynov: "İl ərzində heç bir yol hərəkəti qaydasını pozmayan fərdi avtomobil sürücüləri də fərqləndirilməlidir"
Hər il dünyada baş verən yol qəzalarında 1,3 milyon insan həlak olur, 50 milyon nəfər isə xəsarət alır. Ayrı-ayrı ölkələrdə avtoqəza qurbanlarının sayını azaltmaq üçün təhlükəsizlik tədbirləri, o cümlədən yol hərəkəti qaydalarını pozmağa görə müxtəlif cəzalar tətbiq edilir. Bu cəzalar, tətbiq edildiyi ölkədən asılı olaraq, müxtəlif ağırlıqda olur.
Azərbaycanda da yol hərəkəti qaydalarını pozan sürücülərə qarşı sərt cəzalar tətbiq olunur. Cəza sürücünün yol hərəkəti qaydasını hansı formada pozması nəzərə alınmaqla təyin olunur.
Ancaq elə sürücülər var ki, onlar yol hərəkəti qaydalarına tam olaraq riayət edir. Həmin sürücülər arasında elələri var ki, bir dəfə də olsun qayda pozmayıb.
Ekspertlər təklif edir ki, yol hərəkəti qaydalarına tam şəkildə riayət edən sürücülər mükafatlandırılsın. Mükafat deyəndə onları müxtəlif formada həvəsləndirmək olar. Belə bir qayda tətbiq olunsa, müəyyən müsbət effekt verə bilər. Beləliklə, yol-qəza hadisələrinin sayı da azalar.
Nəqliyyat məsələləri üzrə ekspert Ərşad Hüseynov "Bakı-Xəbər"ə açıqlamasında qeyd etdi ki, hər bir vətəndaş qanunvericiliyin tələbinə əməl etməlidir. Bu bir vətəndaşlıq borcudur.
Həmsöhbətimiz hesab edir ki, daim yol hərəkəti qaydalarına riayət edən sürücülərin piarı aparılmalıdır: "Bu işlə aidiyyəti qurumlar məşğul olmalıdır. Avtobus sürücüləri arasında müsabiqə elan edilə bilər. Ən yaxşı sürücünü sərnişinlərin rəyi əsasında seçmək mümkündür. Səs çoxluğunu toplayan sürücülər ilin sonunda müxtəlif formada mükafatlandırıla bilər. Ola bilər ki, mükafat əlavə əməkhaqqı olsun və ya diplom şəklində verilə bilər. Belə bir müsabiqənin keçirilməsində əsas məqsəd sürücülər arasında maarifləndirmə işinin aparılması olacaq".
Ə.Hüseynovun sözlərinə görə, fərdi avtomobil sürücüləri də fərqləndirilməlidir: "Bu tip sürücülərin həvəsləndirilməsi, bir növ, sosial xarakter daşıyır. Bunun nəticəsində digər sürücülər də fərqlənmək üçün yol hərəkəti qaydalarını pozmamağa çalışacaq".
Günel CƏLİLOVA
