"Əlillər, pensiyaçılar, uşaqlar və tələbələrin icbari tibbi sığorta ödənişlərindən azad olunması..."
Sosial həmrəylik prinsipi əsasında fəaliyyət göstərəcək icbari tibbi sığorta sisteminin maliyyələşdirmə sistemində icbari tibbi sığorta ödənişləri səhiyyənin maliyyələşdirilməsinin başlıca mənbəyi olacaq.
Bunu "Gələcəyin ünvanı: Prezident İlham Əliyevin islahatlar strategiyası" adlı konfransda çıxış edən Nazirlər Kabineti yanında İcbari Tibbi Sığorta üzrə Dövlət Agentliyinin direktoru Zaur Əliyev media nümayəndələrinə açıqlamasında deyib.
O qeyd edib ki, icbari tibbi sığorta sistemində aztəminatlı ailələr, əlillər, pensiyaçılar, uşaqlar, tələbələr və bu kimi əhali qrupları icbari tibbi sığorta ödənişlərindən azad ediləcək. Onun sözlərinə görə, icbari tibbi sığortanın tətbiqi üçün hazırlanan baza zərfi dövlət və sığorta təminatından ibarətdir. Zərfə 1800-dən çox müalicə, müayinə xidmətləri daxil edilib. Buraya terapevtik müalicələrin çox hissəsi daxil edilib ki, onların da xərcləri icbari tibbi sığorta sistemi tərəfindən qarşılanacaq".
Aztəminatlı ailələrin icbari tibbi sığorta ödənişindən azad olunması barədə fikir bildirən sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki, bu addım müsbət dəyərləndirilməlidir: "Qanunvericiliyə əsasən, tibbi ödəniş üç mənbə hesabına həyata keçirilir: özəl sahibkarların, vətəndaşların öz hesabına və dövlət qayğısını təmin edən müvafiq qurumun hesabına. Aztəminatlı ailələrin icbari tibbi sığortaya öz hesabına ödəniş etməsi mümkün deyil. Çünki sosial durumu ağır olan ailələrin şəxsi vəsaitləri hesabına tibbi sığorta ödənişi etməsi mümkün görünmür. Həmin təbəqəyə aid olan insanlara tibbi xidmət dövlət hesabına ödəniləcək. Bu addım dövlətin vətəndaşlara qayğısı kimi dəyərləndirilməlidir".
Həmsöhbətimiz onu da əlavə etdi ki, əlillər, pensiyaçılar, uşaqlar və tələbələrin icbari tibbi sığorta ödənişlərindən azad edilməsi sosial durumu ağır olan ailələrin inkişafına səbəb olacaq.
Günel CƏLİLOVA
