"Balıq dəryadan ayrılmadığı kimi, mən də peşəmdən ayrı qala bilmirəm"...
Polis mayoru Azadə Axundova, 1980-ci il.
Bəli, o qala bilmirdi. Artıq bu sözlər keçmiş zamana aid olsa da, həqiqətən mənalı ömrün keşikçisi olan Azadə xanım özünü peşəsindən kənarda təsəvvür belə etmirdi.
Bəs nə idi bu çətin və məsuliyyətli işdə onu mübariz fədai və mətin qadın edən? Bəlkə təbiətindəki dürüstlük, bəlkə qanunun aliliyi, bəlkə də işinin məsuliyyəti qədər özünü vətəndaşların qulluqçusu hesab etmək? Bəli, o, zərif olmasına baxmayaraq, müsəlləh əsgərtək özünü dövlətin qulluqçusu, onun qanunlarının aliliyini qoruyanlardan biri hesab edirdi.
Döşündə medalı, çiynində rütbəni daşıyacaq qədər məsuliyyətli qadın...
O, Bakıda, ziyalı ailəsində anadan olub. Yaşadığı illərdə müharibənin acı küləyi ondan da yan ötməyib. Ailədə çoxsaylı uşaq olduqlarından hər bir övladın öz sənət yolu, arzusu olub, lakin Azadə xanım həyatının aliliyini o dövrdə "MVD" adlanan Daxili İşlər Nazirliyinə həsr edir.
Qüsursuz zəhmət, təmannasız xidmət...
Azadə xanım 1956-ci ildə Bakı Dövlət Universitetinin (ADU) hüquq fakültəsini bitirərək bu şərəfli peşədə ilk addımlarını atır. İllər keçdikcə işinə və dövlətinə olan sadiqliyi dövrün rəhbərliyinin diqqətindən kənarda qalmır. Vəli Axundovun rəhbərliyi dövründə Tofiq Aslanovun göstərişi ilə dəfələrlə medallarla təltif olunan Azadə xanım elə bunun bariz nümunəsi olaraq 1968-ci ildə "50 let sovetskoy miliüii" medalına, yenidən 1968-ci ildə "Za bezupreçnuö slujbu" medalına, işində qüsursuz xidmətlərinə görə 1974-cü il və 1976-cı illərdə daha necə belə medallara layiq görülür. İşində daha dəqiq və gərgin qrafik rejim üzrə xidmət edir.
İllər öz sözünü deyirdi. Çiynində "Leytenant", "Baş leytenant", "Kapitan", nəhayət, ay-ulduzlu "Mayor" rütbəsi onu heç də başqalarından fərqləndirmədi.
Azadə xanım işində məsuliyyətli olduğu kimi, ailəsində də bu qanun hökm sürürdü. Ailəcanlı, övladlarının, qohumlarının qayğısını çəkən həm də ziyalı ana idi. İllər irəlilədikcə isə ana kəlməsi nəvələri üçün nənə, qaynana sözü ilə əvəzləndi. Övladları, nəvələri, eləcə də, nəticələri onun ömrünün qızıl səhifələri oldu.
Təmənnasız xidmətin nəticəsi olaraq 25 illik əmək fəaliyyətinin müddəti artırılaraq ömrünün 30 ilini peşəsinə həsr etdi.
Azadə Axundova. Bir mənalı ömür sürmüş və bu ömrün xəzanlı payız çağında dünyasını dəyişmiş mübariz qadının adı şərəf lövhələrində öz ziyalılığı ilə seçildi. Örnək oldu və gələcək nəsillərə irs qoydu...
Daxili İşlər Nazırliyinin rəhbərliyi və kollektivi dərin hüznlə başsağlığı verir! Allah rəhmət eləsin!
