"Tibb vasitələrinin və dərmanların reklamı xalqı maarifləndirməyə xidmət etməlidir, kommersiya və pul qazanmaq məqsədilə edilməməlidir"
"Azərbaycanda həkim resepti olmadan dərmanların geniş reklam olunmasının tərəfdarı deyiləm. Həkim resepti olmadan, düzgün təyin edilmədən və səhv dozada dərmanların qəbulu sonra ciddi fəsadlara gətirib çıxarır".
Bu sözləri Milli Məclisin Səhiyyə komitəsinin sədri Əhliman Əmiraslanov komitənin iclasında deyib. O öz çıxışında qeyd edib ki, bəzən kimsə reklamda dərmana baxır, deyir ki, bu patoloji əlamətdən məndə də var, həmin dərmanı alıb qəbul edir. Amma sonra məlum olur ki, həmin dərman ona uyğun deyil və beləliklə, xəstənin müalicəsi daha da çətinləşir. Dərman vasitələrinin reklamının qadağan olunması dəfələrlə səsləndirilib. Qeyd olunub ki, dərman preparatı elə bir vasitədir ki, reklama ehtiyac yoxdur. Kimin səhhətində problem varsa, həkimin təyinatına uyğun aptekə müraciət edib dərman qəbul edə bilər. Televiziya və ya radio kanallarında istənilən adda dərman vasitələri reklam olunur. Ancaq həkim təyinatı olmadan heç bir dərmanın qəbulu düzgün deyil.
Ekspertlər də düşünür ki, dərman preparatlarının reklamı düzgün deyil.
Professor, tibbi ekspert Adil Qeybulla bizimlə söhbətində qeyd etdi ki, dərmanlar reklam edilməməlidir: "Hər xəstəliyin müəyyən müalicəsi və dərmanları var ki, onları xəstənin həkimi müəyyənləşdirir və təyin edir. Reklamların köməyi ilə istifadə edilən dərmanlar insan orqanizmində ciddi fəsadlar yarada bilər.
Beynəlxalq təcrübəyə gəlincə, Amerika və Rusiyada yalnız əlavə təsirlər göstərilməklə dərmanın reklamına icazə verilir. Avropada isə yalnız reseptsiz buraxılan dərmanların reklamına icazə var. Bir sıra ölkələr də var ki, dərman preparatlarının reklamı ümumiyyətlə qadağandır".
Həmsöhbətimiz hesab edir ki, dərman məhsullarının reklamı nəinki məhdudlaşdırılmalı, hətta qadağan olunmalıdır: "Dərman maddəsi reklam oluna, kommersiya məqsədilə satıla bilməz. Dərman ərzaq, gündəlik tələbat vasitəsi deyil. Dünyanın bütün ölkələrində tibb müəssisələrinin, dərmanların reklamı ilə bağlı ciddi qaydalar mövcuddur. Bizdə isə bu məsələlərə ciddi nəzarət olunmur. Tibb vasitələrinin və dərmanların reklamı xalqı maarifləndirməyə xidmət etməlidir, kommersiya və pul qazanmaq məqsədilə edilməməlidir".
Professorun sözlərinə görə, dünyanın heç bir ölkəsində adi insanlar efirdən dərman preparatlarını və tibb müəssisələrinin xidmətlərini reklam etmir: "Bu məsələlər birbaşa insan taleyi və genefondla əlaqəlidir. Bəzən istifadəsinə icazə verilməyən, xəstəyə köməyi olmayan, əksinə, zərər verə bilən vasitələr də burada reklam olunur. Bu səbəbdən yalnız Səhiyyə Nazirliyində və yaxud müvafiq strukturlarda reyestrə düşən və Azərbaycanda istifadəsinə icazə verilən üsullar reklam oluna bilər".
Günel CƏLİLOVA
