Şahin Camalov: "Avtobus idarə etmək istəyənlərin sürücülüklə bağlı məlumatları öyrəniləcək, sürücülük imkanları və psixoloji vəziyyəti araşdırılacaq"
Bakıda şəhərdaxili sərnişin avtobuslarında yaşanan narazılıq hər kəsə bəllidir. Cavan sürücülərin avtobusu necə gəldi idarə etməsi xoşagəlməz hadisələrə səbəb olur. Marşrut sahibləri maşın sürməyi bacaran istənilən sürücüyə avtobusu idarə etməyi həvalə edir. Artıq Bakıda fəaliyyət göstərən marşrut sahibləri avtobuslara sürücü seçmək hüququna malik olmayacaq. Bakı Nəqliyyat Agentliyinin baş direktoru Vüsal Kərimov keçirdiyi mətbuat konfransında bildirib ki, BNA tərəfindən məlum məsələ ilə bağlı vahid sistem yaradılacaq. Bu məsələ ilə bağlı aidiyyəti qurumlara müraciət göndərilib. Bakı Nəqliyyat Agentliyində Vahid Sürücü Sistemi yaradılacaq. Sürücülər müsabiqədən keçəndən sonra standartlara cavab verərsə, həmin sürücünün məlumatı vahid sistemə əlavə ediləcək. Marşrut avtobuslarına sürücülər də həmin sistemdən seçiləcək. Marşrut sahibi artıq özü sürücü təyin edə bilməyəcək.
Ekspertlər də marşrut avtobuslarının müsabiqə əsasında təyin olunmasını müsbət dəyərləndirir.
"Təhlükəsiz Yol" Alyansının koordinatoru Şahin Camalov "Bakı-Xəbər"ə açıqlamasında qeyd etdi ki, avtobus sürücülərinin necə gəldi təyin olunması uzun illərdir ictimaiyyəti narahat edir: "Elə sürücülər var ki, onların avtobus idarə etmək hüququ olmasa belə, rahat şəkildə çalışırlar. Dəfələrlə bu məsələ gündəmə gəlsə də, istənilən nəticə əldə olunmayıb. Sərnişinlər sürücülərin qeyri-peşəkarlığından və insanlarla normal davranmamasından şikayət edir. İlk növbədə marşrutu idarə edən sürücülərin psixoloji durumu öyrənilməlidir. Daha sonra ona sərnişinlərin taleyi etibar oluna bilər".
Həmsöhbətimiz hesab edir ki, avtobus sürücülərinin müsabiqə yolu ilə seçilməsi düzgün addımdır: "Müsabiqə deyəndə test suallarından söhbət getmir. Əsasən onların sürücülüklə bağlı məlumatları öyrəniləcək, sürücülük imkanları və psixoloji vəziyyəti araşdırılacaq. Sürücülərlə bağlı məlumatlar Vahid Sürücü Sisteminə toplanacaq. O baza vasitəsilə hansı marşruta sürücü tələb olunursa, ora sürücü göndəriləcək".
Ş.Camalovun fikrincə, avtobus sürücülərinin müsabiqə yolu ilə seçilməsi yol qəzalarının sayının azalmasına təsir edəcək.
Günel CƏLİLOVA
