Ali, orta ixtisas və peşə-ixtisas təhsili müəssisələrinə tələbə qəbulu planı olmayacaq. Bu, Azərbaycan Prezidenti İlham Əliyevin "Təhsil haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2009-cu il 5 sentyabr tarixli, 156 nömrəli Fərmanında dəyişikliklər edilməsi haqqında" 21 dekabr 2016-cı il tarixli Fərmanında əksini tapıb.
İndiyə qədər "Təhsil haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2009-cu il 5 sentyabr tarixli, 156 nömrəli Fərmanına əsasən, ali və orta ixtisas təhsili müəssisələrinə tələbə qəbulu planının müəyyənləşdirilməsi üzrə vəzifəni Azərbaycan Respublikasının Prezidenti yanında Təhsil üzrə Komissiya, ilk peşə-ixtisas təhsili müəssisələrinə tələbə qəbulu planını Nazirlər Kabineti müəyyənləşdirib. Azərbaycan Prezidentinin 21 dekabr 2016-cı il tarixli Fərmanına əsasən, Azərbaycan Respublikasının Prezidenti yanında Təhsil üzrə Komissiyanın və Nazirlər Kabinetinin bu sahədə səlahiyyətləri ləğv edilib.
Digər dəyişiklik isə ləğv edilmiş Tələbə Qəbulu üzrə Dövlət Komissiyasının səlahiyyətinə daxil olan ali və orta ixtisas təhsili müəssisələrinə tələbə qəbulu, ali təhsil müəssisələrinin magistraturalarına bakalavrların və digər ali təhsilli şəxslərin qəbulu qaydaları ilə bağlıdır. Qəbul qaydalarının müəyyənləşdirilməsi ilə bağlı səlahiyyətlər hazırda TQDK-nın funksiyasını yerinə yetirən Dövlət İmtahan Mərkəzinə deyil, Nazirlər Kabinetinə verilib.
Ümumilikdə, qəbul planının ləğv olunmasına ekspertlər necə yanaşır? Sözügedən məsələni şərh edən təhsil eksperti Etibar Əliyev buna bir neçə prizmadan yanaşır: "Bundan sonra ödənişli təhsil qalacaq, lakin plan yeri olmayacaq. Ali məktəblərdə dövlətin müəyyən sifarişli yerlərinə qəbul olunanlar pulsuz oxuyacaq, qalanları isə öz hesabına təhsil alacaq. Ödənişli yerlərə tələbə qəbulu isə ali məktəblərin maddi-texniki bazasından, müəllim-professor heyətindən asılı olacaq. Burada tələbənin qarşısında yeganə maneə təhsil haqqı olacaq. Ona görə də dövlət sifarişli yerlərin sayı artırılmalıdır. Qəbul planının ləğv edilməsi qlobal anlamda Azərbaycanda hər min nəfərə düşən tələbə sayını artırmağa hesablanıb. Çünki hazırda istər MDB, istərsə də digər dövlətlərlə müqayisədə bu say azdır. Lokal mənada isə ali məktəblərdə yerlərin boş qalmamasına xidmət edir. Ötən il özəl ali məktəblərin bir çoxunda yerlər 30 faiz belə dolmadı. Plan yeri olduğu halda yerlər dolmur. Lakin planı götürdükdən sonra yerlərin dolacağı da sual altındadır. İndi təhsil daha çox maddiləşib. Ola bilər ki, hətta gələcəkdə dövlət ali məktəblərinin ödənişli yerlərinə düşüb təhsildən imtina edənlərin də sayı çoxalsın. Çıxış yolu kimi plan yerlərini ləğv etməklə yanaşı, həm də keyfiyyəti artırıb təhsil haqqını azaltmaq lazımdır".
Vidadi ORDAHALLI
