Məhərrəm Zülfüqarlı: "Elm sahəsində inkişafın əldə olunması üçün bu sahəyə dövlət tərəfindən vəsait ayrılmalıdır"
"Azərbaycanda elm və texnologiya üzrə Ali Şura yaradılmalıdır". Belə bir təkliflə Azərbaycanda Milli Elmlər Akademiyasının (AMEA) prezidenti Akif Əlizadə çıxış edib.
Onun sözlərinə görə, Ali Şuranın qərarı bütün elmi təşkilatlar üçün icbari xarakter daşımalıdır: "Şuranın tərkibində AMEA, təhsil, biznes, patent və gənc alimlərin nümayəndələri olmalıdır. "Elm haqqında" Qanunun əsas vəzifələrindən biri də tədqiqat universitetinin statusunun müəyyənləşdirilməsidir. Elm və təhsil sahəsində mühüm məqamlardan biri də elmin koordinasiyasıdır. Çünki bu istiqamətdə vəziyyət qənaətbəxş deyil. Elmi araşdırmalarda təkrarçılıq, dünya elmində səsləşməyən problemlərin mövcudluğu var. Bununla bağlı müvafiq təkliflərin hazırlanması olduqca vacibdir".
A.Əlizadə bildirib ki, hazırda AMEA-da tədqiqat universitetlərinə qoyulan tələblərin, standartların müəyyənləşdirilməsi üçün xüsusi komissiya fəaliyyət göstərir: "Bu sahədə mühüm məqamlardan biri də elmi fəaliyyətin akkreditasiyasının yaradılmasıdır. Bununla bağlı müvafiq mexanizmlər hazırlanır. Məqsəd dünya standartlarının Azərbaycan elmində tətbiq olunmasıdır".
Təhsil sahəsi üzrə ekspert Rafiq İsmayıl bizimlə söhbətində qeyd etdi ki, elm və təhsilin inkişafı ilə bağlı eyni formatda bir neçə şura yaradılıb: "Onların hər birinin fəaliyyəti yalnız formal xarakter daşıyır. Əgər biz bu gün elm sahəsində tədqiqat aparmaq istəyiriksə, bu sahəyə maliyyə ayırmaq lazımdır. Tədqiqatın istənilən səviyyədə aparılması üçün maliyyə tələb olunur. Bu sahəyə dövlət tərəfindən müəyyən məbləğdə pul ayrılmalıdır".
Həmsöhbətimiz qeyd etdi ki, elmi araşdırmalarda təkrarçılığın mövcud olması dəfələrlə bildirilib. Hətta bununla bağlı müəyyən işlər də görülür: "Texnologiya sahəsində inkişafın əldə olunması üçün elmi şuranın yaradılması isə təqdirəlayiqdir".
Təhsil sahəsi üzrə ekspert Məhərrəm Zülfüqarlı isə hesab edir ki, elm sahəsində inkişafın əldə olunması üçün bu sahəyə dövlət tərəfindən vəsait ayrılmalıdır: "Alimlərin maliyyə durumu hər kəsə bəllidir. Sosial vəziyyəti ağır olan alimin elm və ya texnologiya sahəsində yenilik kəşf etməsini gözləmək düzgün deyil".
Günel CƏLİLOVA
