Məhərrəm Zülfüqarlı: "Təcrübə də göstərir ki, orta məktəbdə xarici dil bilməyən sonradan müəyyən kurslara getməklə bunu öyrənir"
Gələn ildən 9-cu sinif üzrə buraxılış imtahanlarında xarici dil üçüncü imtahan fənni kimi əlavə oluna bilər. Xəbər verildiyi kimi, bunu jurnalistlərə açıqlamasında Dövlət İmtahan Mərkəzinin Direktorlar Şurasının sədri Məleykə Abbaszadə deyib.
Onun sözlərinə görə, hazırda 11-ci sinif üzrə buraxılış imtahanlarında şagirdlər xarici dildən imtahan verir: "Bu il 9-cu sinif üzrə buraxılış imtahanlarında şagirdlər yalnız Azərbaycan dili və riyaziyyatdan imtahan verəcək. Ola bilsin ki, gələn ildən 9-cu sinifdə də üçüncü fənn kimi xarici dil əlavə olunsun. Biz bu il bununla bağlı monitorinq imtahanları keçirərək nəticələrini ictimaiyyətə və Təhsil Nazirliyinə təqdim edəcəyik".
M.Abbaszadə deyib ki, bu il 9-cu sinif üzrə imtahanlar fevralın sonu-martın əvvəlində 4 region üzrə keçiriləcək. İlk imtahan Bakıda baş tutacaq. Ümumilikdə, bütün ölkə üzrə birinci mərhələnin imtahanlarının üç həftə ərzində, yəni martın sonuna kimi yekunlaşdırılması planlaşdırılır.
M.Abbaszadə deyib ki, ikinci mərhələnin də imtahanları iyunun 15-dən sonra 4 bölgə üzrə keçiriləcək. M.Abbaszadə iki ildən sonra 9-cu və 11-ci sinif şagirdləri üçün vahid imtahanların keçirilməsinin mümkün olub-olmayacağına da münasibət bildirib. Onun sözlərinə görə, ilk olaraq builki buraxılış imtahanlarının nəticələri müzakirə olunmalıdır. Nəticələrdən asılı olaraq isə müəyyən fikir söyləmək olar.
Nəzərə alsaq ki, 11-ci sinif buraxılış imtahanlarında xarici dildən imtahan verilir, o zaman 9-cu sinifdə buna nə ehtiyac var? Olmazmı ki, bunun əvəzinə məzunlar Azərbaycan tarixi fənnindən imtahan versin?
Məsələyə münasibət bildirən təhsil eksperti Məhərrəm Zülfüqarlının sözlərinə görə, Məleykə Abbaszadənin təklifi indiki halda məqbul deyil: "Düzdür, şagirdlərin xarici dil bilməsi onların gələcək inkişafına müsbət təsir göstərəcək. Ancaq nəzərə alsaq ki, məktəblərdə təhsilin keyfiyyəti aşağıdır, o zaman bu problem yaradacaq. Yəni orta məktəbdə ingilis dili müəlliminə verilən məvaciblə şagirdə xarici dil öyrətmək mümkün deyil. İngilis dilini öyrənmək üçün xüsusi kurslarda təhsil almaq lazımdır və s. Bu baxımdan şagirdlərə daha yaxın olan, vətənpərvərlik hissi aşılayan Azərbaycan tarixinin imtahana salınması məqbuldur. Biz birinci orta məktəbdə vətənpərvərlər yetişdirməliyik ki, gələcəkdə vətəni müxtəlif səviyyələrdə müdafiə edə bilsin. Təcrübə də göstərir ki, orta məktəbdə xarici dil bilməyən şagirdlər sonradan müəyyən kurslara getməklə bunu öyrənir və yüksək təhsil alır. Bu baxımdan bizim 9-cu sinfə qədər olan uşaqları reallığa uyğun olmadan xarici dil imtahanına gətirməyimiz hələ yetişməmiş bir məsələdir. Bu da problemlər yaradacaq. Yenə də neqativ hallar, məktəblərdə tapşırma özünü göstərəcək. Ona görə də imtahanlara Azərbaycan tarixi fənnini salmaq daha məqsədəuyğundur".
Vidadi ORDAHALLI
