"Saxta elmə marağın artdığını nəzərə alaraq Yalançı Elmə Qarşı Mübarizə üzrə Komissiya yaradılıb"
Xəbər verildiyi kimi, Azərbaycan Milli Elmlər Akademiyası (AMEA) yalançı elmlə mübarizə aparacaq. Akademiyada bu məqsədlə Yalançı Elmə Qarşı Mübarizə üzrə Komissiya yaradılıb. Hətta bununla bağlı qərar AMEA-nın Rəyasət Heyətinin dekabrın 7-də keçirilən toplantısında qəbul edilib.
Xəbərə görə, AMEA-nın prezidenti Akif Əlizadə media nümayəndələrinə açıqlamasında deyib ki, son illər elmi fəaliyyət sahəsində həyata keçirilən çoxşaxəli islahatlar və elmin təbliği istiqamətindəki tədbirlər nəticəsində elmin nüfuzu cəmiyyətdə yüksəlib. Lakin bununla yanaşı, elmi fəaliyyətə münasibətdə bir sıra neqativ tendensiyaların da müşahidə olunduğunu vurğulayan akademik xüsusilə yalançı elmə marağın artdığını, elmi imitasiya tipli fəaliyyətin genişləndiyini söyləyib.
Rəyasət Heyəti qeyd olunanları nəzərə alaraq, yalançı elmi iddiaların əsl mahiyyətini şərh etmək və ictimaiyyətə çatdırmaq, həmçinin yalançı elmə qarşı mübarizə üçün maarifləndirmə tədbirləri həyata keçirmək məqsədilə komissiya yaradıb. Yalançı Elmə Qarşı Mübarizə üzrə Komissiyanın tərkibi təsdiq edilib.
Komissiyanın fəaliyyəti ilə bağlı AMEA-nın Rəyasət Heyətinə müraciət etdik. AMEA-nın Rəyasət Heyətindən "Bakı-Xəbər"ə verilən məlumatda bildirilir ki, Yalançı Elmə Qarşı Mübarizə üzrə Komissiya yeni yaradılıb: "Elm sahəsində həyata keçirilən islahatlar elmin nüfuzuna müsbət mənada təsir edib. Bu islahatlar nəticəsində gənclərin elmə marağı artıb, xüsusən də gənclərin elmə axınının şahidi oluruq. Bütün bunlarla yanaşı, elmi fəaliyyətə münasibətdə bir sıra xoşagəlməz hallara rast gəlinir. Saxta elmə marağın artdığını nəzərə alaraq Yalançı Elmə Qarşı Mübarizə üzrə Komissiya yaradıldı. Yaradılan komissiyanın fəaliyyəti yalançı elmlə mübarizə aparmaqdır. Komissiyanın tərkibi bu şəxslərdən ibarətdir:
Akademik Dilqəm Tağıyev, sədr,
AMEA-nın müxbir üzvü Bəxtiyar Əliyev, müavin,
Akademik Telman Əliyev,
Akademik Hətəm Quliyev,
Akademik Vasif Babazadə,
AMEA-nın müxbir üzvü Nuru Bayramov,
AMEA-nın müxbir üzvü Namiq Cəlilov".
Günel CƏLİLOVA
