Yasamal rayonu 13 saylı orta məktəb - Yaqut Sadıqova: "Oktyabrdan bu günə qədər uşaqların təfəkküründə xeyli dəyişiklik hiss olunur"
308 saylı orta məktəb - Təranə Əliyeva: "Məktəbəqədər təhsil qruplarına yazılan uşaqların nəticələri yüksək səviyyədədir"
Azərbaycanda 12 illik təhsilə keçidlə əlaqədar qanunvericilikdə müəyyən dəyişikliklər edilib. Yeni qaydalara əsasən, 5 yaşlı uşaqlar üçün məktəbə hazırlığın zəruriliyi qərarlaşıb.
Oktyabr ayından başlayaraq Azərbaycanın orta təhsil müəssisələrində 5 yaşlı uşaqlar üçün məktəbə hazırlıq qrupları fəaliyyətə başlayıb. Artıq bununla bağlı hazırlığa cəlb olunacaq uşaqların sənədləri yığılıb, siniflər və qruplar müəyyənləşib. Nazirlər Kabinetinin "Uşaqların məktəbə hazırlığının təşkili məsələləri haqqında" Qərarında nəzərdə tutulduğu kimi, bu proses müəyyən mərhələlərlə həyata keçiriləcək.
Qərar ilkin mərhələdə 2011-ci ildə doğulan və hazırda 5 yaşı olan uşaqlara şamil olunur.
Orta məktəblərdə 5 yaşlı uşaqlar üçün məktəbə hazırlıq qruplarının fəaliyyəti, uşaqların bu tədris metoduna reaksiyasını öyrənmək məqsədilə təhsil müəssisələri ilə əlaqə saxladıq.
Xətai rayonunda yerləşən 17 saylı orta məktəbin direktoru Tahir Həmzəyev "Bakı-Xəbər"ə açıqlamasında qeyd etdi ki, oktyabr ayından etibarən rəhbərlik etdiyi məktəbdə məktəbəqədər hazırlıq qrupu fəaliyyət göstərir: "Məktəbdə 2 məktəbəqədər hazırlıq qrupu mövcuddur. Hər bir qrupda 30 uşaq təhsil alır. Qrupun biri Azərbaycan dili, digəri isə rus dili təmayüllüdür. Balacalar bütün tədris vəsaitləri ilə təmin olunub. 5 yaşlı uşaqların məktəbə gəlməyə böyük həvəsi var. İlk olaraq biz düşünürdük ki, uşaqların marağı olmaz, ancaq bizim düşündüyümüzün tam əksi ilə qarşılaşdıq. Mən şəxsən məktəbəqədər təhsil qruplarının təhsil prosesində iştirak etmişəm. Onlardan məktəbin necə olmasını soruşarkən hər biri bir ağızdan məktəbi çox sevdiyini dilə gətirib. Balacalar çox aktivdir".
Yasamal rayonunda mövcud olan 13 saylı orta məktəbin direktoru Yaqut Sadıqova bizimlə söhbətində bildirdi ki, onun rəhbərlik etdiyi tədris müəssisəsində bir məktəbəqədər hazırlıq qrupu açılıb: "Yer azlığına görə məktəbdə bir qrup açmaq qərarına gəldik. Uşaqlar böyük həvəslə məktəbə gəlir. Oktyabrdan bu günə qədər uşaqların təfəkküründə xeyli dəyişiklik hiss olunur. Bağçada təhsil alan uşaqla, məktəbəqədər dərsə gələn 5 yaşlı uşaq arasında böyük fərq var. Bu fərq onların məntiqində, rəsmə marağında aydın görünür".
308 saylı orta məktəbin direktoru Təranə Əliyeva qəzetimizə açıqlamasında qeyd etdi ki, adıçəkilən təhsil müəssisəsində 4 məktəbəqədər təhsil qrupu var: "Hər bir qrupda 30 uşaq təhsil alır. Qrupların hər biri Azərbaycan dili təmayüllüdür. Məktəbə gələn 5 yaşlı uşaqlar böyük həvəslə dərsdə iştirak edir. Dərsdə onlara təfəkkür, rəsm, musiqi, ətraf aləmlə tanışlıq öyrədilir. Mən özüm də balacaların dərslərində iştirak etmişəm və onların dərsə necə maraq göstərdiyinin şahidi olmuşam".
T.Əliyevanın sözlərinə görə, məktəbəqədər təhsil qruplarına yazılan uşaqların nəticələri yüksək səviyyədədir.
Günel CƏLİLOVA
