Bahadur Bilalov: "Turizmin kütləviliyini təmin etmək üçün ilk növbədə müxtəlif ölkələrə ucuz aviareyslər açılmalıdır"
Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi açıqlanıb. Sənəd Prezident İlham Əliyevin 2016-cı il 6 dekabr tarixli Fərmanı ilə təsdiq edilib.
Strateji Yol Xəritəsində Azərbaycanın turizm sektorunun inkişafı üzrə dörd əsas hədəf müəyyənləşdirilib. Qeyd olunur ki, bu sektor üzrə uzunmüddətli perspektivə nail olmaq məqsədilə 2020-ci ilədək olan dövr üçün ölkə üzrə turizm sektorunda dörd əsas hədəf müəyyənləşdirilib. Birinci hədəf Bakının turizm potensialından tam istifadə etməkdir. Hazırda Bakı şəhəri daha yaxşı inkişaf etmiş infrastruktura malik olmaqla, çoxsaylı xarici turistlərin marağını cəlb etməkdədir. Bu istiqamətdə müəyyənləşdirilmiş dörd prioritet Azərbaycanın bu perspektivə nail olmasına imkan verəcək.
Sənəddə bildirilir ki, ikinci hədəf milli səviyyədə daha yaxşı idarəetmənin təşkili, turizm və rekreasiya zonalarının yaradılması, mövsümiliyin aradan qaldırılması üçün regional səviyyədə turizm infrastrukturunun inkişafı, hava əlaqələrinin yaxşılaşdırılması, viza prosedurlarının sadələşdirilməsi də daxil olmaqla, turizm sektorunun inkişafı üçün ölkə üzrə əlverişli mühitin formalaşdırılmasıdır.
Üçüncü hədəf regional turizm təşəbbüslərini həyata keçirməklə Azərbaycanda turizmi inkişaf etdirməkdir. Belə ki, daha yaxşı inteqrasiya olunmuş turizm sektoruna nail olmaq üçün sağlamlıq, qış və ekoturizm kimi turizm növlərinin inkişafına investisiya qoyuluşları həyata keçiriləcək.
Dördüncü hədəf isə turizm sahəsində təhsil proqramlarına investisiya qoyuluşunu həyata keçirməkdən və turistlərin məmnunluğunu artırmaq üçün standartlaşdırma və sertifikatlaşdırma sistemini təkmilləşdirməkdən ibarətdir.
Ümumilikdə, Azərbaycanda turizmin inkişafı baxımından sözügedən hədəfləri ekspertlər necə dəyərləndirir?
Məsələyə münasibət bildirən turizm sahəsi üzrə ekspert Bahadur Bilalovun sözlərinə görə, sözügedən sənəddən irəli gələn məsələlər həll edilsə, bu sahədə ciddi nəticə əldə etmək olar: "Orada göstərilən işlər yerinə yetirilsə, Azərbaycanda ixtisaslaşmış turizm sənayesinin yaradılması mümkün olacaq. Bunun nəticəsində ölkə dünyada turizm üzrə inkişaf etmiş ilk 20-lik ölkələr sırasına düşə bilər. Təbii ki, biz buna inanırıq. Sənəddə prioritetlər tam dəqiqliyi ilə göstərilib. Bütün dünya praktikasında belədir ki, ölkəyə gələn turistlər ilk növbədə paytaxta gəlir. Bu nöqteyi-nəzərdən orada ilk növbədə Bakının turizm potensialından istifadə olunması qeyd olunub. Sənəddə bu potensialdan istifadə edərək ölkəyə turizm axınının artırılmasından söhbət gedir. Mənə belə gəlir ki, turizmin kütləviliyini təmin etmək üçün ilk növbədə müxtəlif ölkələrə ucuz aviareyslər açılmalıdır. Bu istiqamətdə işləri sürətləndirmək lazımdır. Lazım gələrsə, bundan ötrü AZAL-a alternativ mülki aviaşirkət yaratmaq lazımdır".
Vidadi ORDAHALLI
