Əjdər Ağayev: "Sub-bakalavrda orta ixtisas səviyyəsi olduğu üçün, burada sadəcə, müəyyən ixtisaslı kadr hazırlanması nəzərdə tutulur"
Azərbaycanda universitetlərin nəzdində 2 illik sub-bakalavr pilləsi (kolleclər) yaradılması nəzərdə tutulur. Bu, "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə öz əksini tapıb.
Qeyd olunub ki, bu addım gənclərin orta ixtisas təhsili ilə əhatəolunma səviyyəsini artıra bilər. Bunun üçün ilk peşə və orta ixtisas təhsili müəssisələrinin mövcud vəziyyəti araşdırılacaq, onların infrastruktur, maddi-texniki baza, müəllim-pedaqoji heyətinin potensialının qiymətləndirilməsi aparılacaq. Peşə təhsili müəssisələri şəbəkəsinin rasionallaşdırılması planına əsasən, peşə təhsili müəssisələrinin birləşdirilməsi və müəyyən peşə istiqamətləri üzrə ixtisaslaşmış peşə təhsili mərkəzlərinin yaradılması təşviq olunacaq. Peşə təhsili müəssisələrinin mövcud müəllim-pedaqoji heyətinin diaqnostik qiymətləndirilməsi və onların bilik və bacarıqlarının artırılması, yeni müəllim heyətinin peşə təhsili və təlimi prosesinə cəlb edilməsi ilə bağlı tədbirlər dəstəklənəcək. Peşə təhsili müəssisələrinin mövcud müəllim-pedaqoji heyətinin potensialı və peşəkarlıq səviyyəsinin qiymətləndirilməsi və ixtisasının artırılması, prioritet ixtisaslar üzrə yüksək peşəkarlığa malik istehsalat təlimi ustalarının və pedaqoji heyətin cəlb olunması üçün zəruri tədbirlər həyata keçiriləcək. Həm işəgötürənlər, həm də onların tədris prosesinə cəlb ediləcək mütəxəssisləri üçün müvafiq həvəsləndirici və stimullaşdırıcı tədbirlər müəyyən ediləcək.
Maraqlıdır, sub-bakalavr pilləsinin mahiyyətini ekspertlər necə şərh edir? Bunun əhəmiyyəti nədən ibarətdir?
Sözügedən məsələyə aydınlıq gətirən Azərbaycan Təhsil Şurasının sədri Əjdər Ağayev bir sıra məqamlara toxundu: "Bakalavr pilləsi 4 ildir, amma sub-bakalavr pilləsi 2 il, 2 il yarım ola bilər. İkinci şərt ondan ibarətdir ki, bakalavr pilləsinin proqramlarında saatların sayı çoxdur və ixtisasa uyğun olaraq proqramlar daha geniş şəkildə tədris olunur. Bundan əlavə, onların özünün ayrıca tədris planı var ki, bakalavr proqramlarının yerinə yetirilməsi nəzərdə tutulur. Həmçinin, bu, tədris planında öz əksini tapır. Sub-bakalavrda orta ixtisas səviyyəsi olduğu üçün, burada daha yüksək ixtisaslı kadr deyil, sadəcə, müəyyən ixtisaslı kadr hazırlanması nəzərdə tutulur. Burada fənlərin sayında, ona ayrılan saatlarda da fərq ola bilər. Eyni zamanda, nəzəri materialların tətbiqi, praktiki təcrübə məsələlərində fərq ola bilər. Bakalavr pilləsi magistraturaya qəbulla bağlı tam səlahiyyət verir. Ancaq sub-bakalavr buna imkan vermir. Sub-bakalavr bakalavrın 3-cü kursuna daxil olub onu bitirəndən sonra magistraturaya girə bilir. Sub-bakalavrın nəzərdə tutulması ehtiyac olan ixtisaslar üzrə çevik kadr hazırlanması ilə bağlıdır. Haradakı ehtiyac var, ora çevik kadr hazırlansın. Kadr işləyə-işləyə bakalavrın 3-cü kursuna qəbul olunub oranı tamamlaya bilər. Yəni bu bir pillədir, keçid mərhələsidir ki, arada ondan istifadə etmək olar. Ona görə sub-bakalavr nəzərdə tutulub".
Vidadi ORDAHALLI
