Rafiq İsmayıl: "Dərs vəsaitlərindən reklam mətnlərinin yığışdırılması şagirdlərin fikrinin dərsə yönəlməsinə səbəb olacaq"
Azərbaycanda dərsliklərdə, dərs vəsaitlərində, tədris materiallarında, məktəb gündəliyində, dəftərdə, yetkinlik yaşına çatmayanlar üçün nəzərdə tutulmuş kitablarda reklam yerləşdirilməsi qadağan olunur.
Prezident İlham Əliyevin qanunvericilik təşəbbüsü ilə "Təhsil haqqında" Qanuna təklif olunan əlavə və dəyişikliklər Milli Məclisə daxil olub. Əlavə və dəyişikliklərə görə, qanunun 11.4-cü maddəsi "dərsliklərdə, dərs vəsaitlərində, tədris materiallarında, məktəb gündəliyində, dəftərdə, yetkinlik yaşına çatmayanlar üçün nəzərdə tutulmuş kitablarda reklam yerləşdirilə bilməz" formasında yeni redaksiyada verilir.
Qeyd edək ki, dərs vəsaitlərindən reklamın çıxarılması uzun müddət müzakirə olunurdu. Əlinə məktəb dərsliyini alan şagird kitabı vərəqləyərkən orada reklamı görən zaman onun fikri dərsdən yayınır.
Təhsil ekspertləri də dəfələrlə öz çıxışlarında bildirib ki, dərs vəsaitlərindən, o cümlədən, tədris materiallarından reklam mətni yığışdırılmalıdır.
Təhsil eksperti Rafiq İsmayıl "Bakı-Xəbər"ə açıqlamasında qeyd etdi ki, "Təhsil haqqında" Qanuna təklif olunan əlavə və dəyişikliklərdə dərsliklərdən reklamın yığışdırılmasının qeyd olunması təqdirəlayiqdir: "Orta məktəb şagirdinə hər hansı bir əşyanı və ya müəssisəni reklam etmək düzgün deyil. Məktəblinin reklamla təmasda olmasının nə kimi əhəmiyyəti ola bilər? Reklam şirkətləri reklam üçün məktəb materiallarından deyil, digər vasitələrdən istifadə etməlidir. Onların seçimi yanlışdır".
Həmsöhbətimiz hesab edir ki, dərs vəsaitlərindən reklam mətnlərinin yığışdırılması şagirdlərin fikrinin dərsə yönəlməsinə səbəb olacaq. Bu çox düzgün və yerində verilmiş qərardır.
Günel CƏLİLOVA
