Nadir İsrafilov: "Onsuz da əvvəlkilərlə müqayisədə sınaq imtahanlarına gedənlərin sayında azalma olub"
Azərbaycanda buraxılış imtahanlarından başqa digər növ imtahanların ödənişli olması üçün həmin xidmətlər Tarif Şurasının müvafiq siyahısına daxil edilməlidir. Bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə "Ümumi təhsil pilləsində təhsilalanların yekun qiymətləndirilməsinin (attestasiyasının) aparılması qaydaları"nın təsdiq edilməsi ilə əlaqədar dünən keçirdiyi brifinqdə deyib.
M.Abbaszadə əlavə edib ki, bu barədə qərar verildikdən sonra imtahanların maliyyələşdirilməsinin hansı formada olacağı ilə bağlı müzakirələr aparılacaq. Onun sözlərinə görə, imtahanların hansı formada keçirilməsi ilə bağlı işçi qrupu səviyyəsində müzakirələr daim aparılır: "Dövlət İmtahan Mərkəzi Tarif Şurasının mütəxəssisləri, iqtisadçılarla birgə müzakirələr aparır. Amma bunu hüquqi müstəviyə keçirmək üçün Nazirlər Kabineti qərar verməlidir. Prezident İlham Əliyevin aprel ayında verdiyi fərmanla Nazirlər Kabinetinə göstəriş verilib ki, bütün qanunlar və normativ sənədlər yeni fərmanda nəzərdə tutulan məsələlərə uyğunlaşdırılsın. İlk olaraq bu uyğunlaşdırma aparılmalıdır. Uyğunlaşdırma aparıldıqda artıq yeni funksiyalarımızın necə icra olunacağı müəyyənləşəcək və bu sahədə legitimlik yaranacaq. Bununla əlaqədar hələ qərarı gözləyirik. Sonra ictimaiyyətə yeniliklər barədə açıqlama verə biləcəyik".
Maraqlıdır, ekspertlər buraxılış imtahanlarından başqa digər növ imtahanların ödənişli olmasına necə yanaşır? Məsələyə münasibət bildirən təhsil üzrə ekspert Nadir İsrafilovun fikrincə, hər şeyin pullu olması doğru deyil: "Ümumiyyətlə, dövlətimizin siyasəti, təhsilin əlçatan olması, neft kapitalının insan kapitalına çevrilməsi və büdcəmizin sosialyönümlü olması kimi prinsiplərlə bu məsələ heç cürə uyğunlaşmır. Hazırda ali məktəblərin 70 faizində ödənişli təhsildir. Sənəd vermək ödənişlidir və indi imtahanların da ödənişli olması nəzərdə tutulur. Ölkəmizdə təhsillə bağlı testləri və imtahan xərclərini Dövlət İmtahan Mərkəzi boynuna götürür. Onda belə çıxır ki, DİM maliyyə məsələlərini ört-basdır etməlidir. Bunun üçün də belə addım atılması nəzərdə tutulur. Hesab edirəm ki, ali məktəblərin ödənişli olması insanların xarici ölkələrə üz tutmasına gətirib çıxarır. Bunun özü Azərbaycandan "beyin axını"nın olmasıdır. Təkcə sənəd vermək üçün ödəniş edilirsə, gələcəkdə kirayə pulunu ödəmək, illik ödənişləri etmək çox gərgin olacaq. Hazırda əhalinin maddi vəziyyəti o dərəcədə deyil ki, bunu etsin. Bütün bunlar təhsilə marağı bir az da aşağı salacaq. Onsuz da əvvəlkilərlə müqayisədə sınaq imtahanlarına gedənlərin sayında azalma olub. Bu qədər testlər və kitabçalar çap olunur, satışlardan müəyyən gəlir əldə edirlər. Yuxarı orqanlarda, Nazirlər Kabineti qarşısında bu məsələ qaldırılmalıdır. Hər şeyi ödənişli etmək düzgün deyil. Ümumiyyətlə, bu məsələdə hansısa perspektiv görmürəm. Təhsilimizi inkişaf etdirmək istəyiriksə, daxili imkanlarımız hesabına təhsilin maddi yönümünü aşağı salmalıyıq. Amma ildən-ilə artım davam edir və kütləvi narazılıq meydana çıxır".
Vidadi ORDAHALLI
