Ötən gün "Azərbaycan Tələbə Kartı" yeni variantda təqdim edilib. Tədbirdə çıxış edən gənclər və idman naziri Azad Rəhimov bildirdi ki, bu çox maraqlı və faydalı bir layihədir, tələbələr üçün dəstək və köməkdir. Nazirin sözlərinə görə, tələbələrimizin böyük uğurları var:
"Tələbələrimiz Azərbaycanda keçirilən beynəlxalq tədbirlərdə, o cümlədən Birinci Avropa Oyunlarında, "Formula 1"də könüllü kimi fəal iştirak ediblər. Biz istəyirik ki, bu kart tələbələr üçün bir kömək olsun".
A.Rəhimov onu da vurğuladı ki, bu kart gələcəkdə tələbələrə daha çox imkanlar açacaq.
Tədbirdə, həmçinin, Azərbaycan Tələbə Gənclər Təşkilatları İttifaqının (ATGTİ) sədri, Milli Məclisin deputatı Şahin İsmayılov, Milli Məclisin Gənclər və idman komitəsinin sədri Fuad Muradov, Azərbaycan Prezidenti yanında Gənclər Fondunun icraçı direktoru Fərhad Hacıyev və "Azərbaycan Tələbə Kartı" ilə əməkdaşlıq edən şirkətlərin nümayəndələri çıxış edərək kartın əhəmiyyəti barədə danışdılar.
Qeyd olundu ki, bu layihə tələbələrə sosial dəstəyin artırılması məqsədi daşıyır. Layihə artıq özünü doğruldub və daha çox şirkət layihəyə qoşulub. Həmçinin o da bildirildi ki, "Azərbaycan Tələbə Kartı" ilə əməkdaşlıq edən şirkətlərin sayının artırılması istiqamətində işlər bundan sonra da davam etdiriləcək. Sonra bir sıra tələbələrə yeni kartlar təqdim edildi
Günel CƏLİLOVA
