Məhərrəm Zülfüqarlı: "Ümumiyyətlə, tarixən imtahandan çox məşhur şəxslər də ehtiyat edib"
2016-2017-ci tədris ilində ümumi orta təhsil səviyyəsi (IX sinif) təhsil alanların biliyinin yekun qiymətləndirilməsi (attestasiya) fənn kurikulumlarının tətbiqi ilə bağlı bütün yeniliklər nəzərə alınaraq, yeni qaydalar əsasında həyata keçiriləcək.
Bunu Dövlət İmtahan Mərkəzinin Direktorlar Şurasının sədri Məleykə Abbaszadə deyib. Onun sözlərinə görə, qəbul olunmuş qaydalara əsasən, 9-cu sinifdə buraxılış imtahanı iki mərhələdə keçiriləcək: "Birinci mərhələdə şagirdlərə Azərbaycan dili (rus dili) fənnindən oxuyub-anlama və yazı bacarıqlarını yoxlamaq məqsədilə 10 açıq tipli (cavab variantları verilməyən, doğru cavabın müəyyənləşdirilib yazı ilə ifadə olunması tələb edilən test tapşırığı), 10 qapalı tipli (cavab variantlarından doğru cavabın müəyyənləşdirilib qeyd edilməsi tələb olunan test tapşırığı), riyaziyyat fənnindən riyazi bacarıqları yoxlamaq məqsədilə 10 açıq tipli, ümumilikdə 30 test tapşırığı təqdim ediləcək. Bundan əlavə, şagirdlər birinci mərhələdə təqdim edilmiş mövzulardan birini seçməklə, könüllülük əsasında inşa (esse) yazacaq. Ümumi orta təhsil haqqında fərqlənmə sənədini almaq üçün inşanın qiyməti nəzərə alınacaq.
İkinci mərhələdə digər məzmun standartları üzrə bilik və bacarıqları yoxlamaq məqsədilə hər bir fənn üzrə 30, ümumilikdə 60 qapalı tipli test tapşırığı təqdim ediləcək".
Ümumilikdə, şagirdlərin birinci mərhələdə təqdim edilmiş mövzulardan birini seçməklə, könüllülük əsasında inşa (esse) yazmasına ekspertlər necə baxır? Sözügedən məsələni dəyərləndirən təhsil sahəsi üzrə ekspert Məhərrəm Zülfüqarlının fikrincə, imtahan qaydalarının tez-tez dəyişdirilməsi şagirdləri çaşdırır: "Məktəb vaxtı imtahan verən şagirdlər qəbul imtahanlarını daha rahat verir. Lakin imtahan qaydalarının tez-tez dəyişdirilməsi şagirdləri, valideynləri və müəllim heyətini çaşdırır. Ümumiyyətlə, tarixən imtahandan çox məşhur şəxslər də ehtiyat edib. Hesab edirəm ki, imtahanların qaydalarının dəyişdirilməsi, imtahanlarla bağlı tez-tez müxtəlif təcrübələrin aparılması yaxşı hal deyil. O üzdən, imtahanların keçirilmə qaydaları stabilləşməlidir. Həm qəbul, həm də orta məktəblər üçün vahid imtahan qaydaları müəyyənləşərsə, uşaqlar da buna uyğunlaşar. Bu amil də nəzərə alınmalıdır".
Vidadi ORDAHALLI
