Məlahət Mürşüdlü: "Gənclərin peşə məktəbinə maraq göstərməsi üçün onların işlə təmin olunması məsələsinin həlli vacibdir"
Azərbaycanda peşə təhsili sahəsində həm işəgötürənlər, həm də onların tədris prosesinə cəlb ediləcək mütəxəssisləri üçün müvafiq həvəsləndirici tədbirlər müəyyən ediləcək.
Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə deyilir. Qeyd olunur ki, "İlk peşə-ixtisas təhsili üzrə ixtisasların Təsnifatı"nın əmək bazarının tələblərinə uyğunlaşdırılması, işəgötürənlərin kadr hazırlığına yaxından cəlb olunması, regionlarda, xüsusən də sənaye mərkəzlərində eyni peşə istiqamətləri üzrə paralel kadr hazırlığını həyata keçirən ilk peşə-ixtisas təhsili müəssisələri şəbəkəsinin optimallaşdırılması, maraqlı tərəflərin, xüsusilə də müəssisə və təşkilatların nümayəndələrinin ilk peşə-ixtisas təhsili müəssisələrinin idarə olunmasına cəlb edilməsi dəstəklənəcək. Bu məqsədlə iqtisadiyyatın müxtəlif sektorlarından olan əsas işəgötürənlərlə sıx əməkdaşlıq əlaqələrinin qurulması, peşə təhsili müəssisələrinin keyfiyyət və kəmiyyət göstəricilərinin yaxşılaşdırılması ilə bağlı fəaliyyətlər təşviq ediləcək.
Məsələ ilə bağlı fikir bildirən Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, peşə təhsilinin stimullaşdırılması yönündə atılan hər bir addım təqdirəlayiqdir: "Ölkə başçısı İlham Əliyev tərəfindən təsdiq olunan "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə peşə təhsilinin inkişafı üçün müəssisə və təşkilatların bu sahəyə cəlb olunması sevindiricidir".
Həmsöhbətimizin sözlərinə görə, peşə məktəbini bitirən gənclərin işlə təmin olunması aktual problem olaraq qalır: "Adıçəkilən sənəddə peşə məktəbini bitirən gənclə işəgötürən tərəfin birgə əməkdaşlıq etməsi məsələsinin qeyd olunması vacib məqamdır. Peşə məktəbini bitirən gənclərin işlə təmin olunması tək Təhsil Nazirliyi və digər aidiyyəti qurumların üzərinə düşməməlidir. Bu işdə məsuliyyət eləcə də digər müəssisə və təşkilatların üzərinə düşür. Müəssisələr peşə məktəblərinə hər hansı bir sahə ilə bağlı sifariş verməlidir. Bu sifarişlər əsasında gənclər peşə məktəbini bitirdikdən sonra işlə təmin oluna bilər. Bunun özü böyük bir dəstəkdir. Gənclərin peşə məktəbinə maraq göstərməsi üçün onların işlə təmin olunması məsələsinin həlli vacibdir".
Günel CƏLİLOVA
