"Müvafiq strukturlar formalaşandan sonra əczaçılıq sahəsinə nəzarət sistemi yaradılmalıdır"
Azərbaycan Səhiyyə Nazirliyi tərəfindən əczaçılıq müəssisələrinin yaradılması və fəaliyyətini tənzimləyəcək yeni tələblər hazırlanıb. Bunu SN-in Analitik Ekspertiza Mərkəzinin direktoru Murad Süleymanov media nümayəndələrinə açıqlamasında deyib.
O bildirib ki, Azərbaycanda əczaçılıq fəaliyyəti "Dərman vasitələri haqqında", "Lisenziyalar və icazələr haqqında" qanunlar və SN-in "Əczaçılıq fəaliyyəti sahəsində normativ sənədlərin təsdiq edilməsi barədə" 2 oktyabr 2006-cı il tarixli, 153 nömrəli əmri ilə tənzimlənir.
Mövcud qaydaların qəbul olunmasından 10 ilə yaxın müddət keçdiyini deyən mərkəz direktoru qeyd edib ki, ötən müddətdə Ümumdünya Səhiyyə Təşkilatının və Beynəlxalq Əczaçılıq Federasiyasının dərman vasitələrinin istehsalı, saxlanması, daşınması, satışı zamanı dərman vasitəsinin keyfiyyəti, təhlükəsizliyi və effektivliyi üzərində nəzarət sahəsini tənzimləyən standartlarında yeniliklər baş verib. Bunları nəzərə alaraq əczaçılıq fəaliyyəti sahəsində mövcud normativ sənədlərin təkmilləşdirilməsi zərurəti yaranıb.
Məsələ barədə fikir bildirən professor, tibbi ekspert Adil Qeybulla bizimlə söhbətində qeyd etdi ki, əczaçılıqla bağlı yeni tələblərin hazırlanması lazımi effekt verməyəcək: "Çünki hər bir fərdi qəbul olunan qərarın qüsurlu olmasını zaman bizə göstərir".
Həmsöhbətimiz hesab edir ki, əczaçılıq sahəsində müsbət dinamikanın yaranmasını istəyiriksə, bu sahədə bəzi dəyişikliklər etmək lazımdır. İlk öncə dərman maddələrinin reyestri, farmokopiyası yaradılmalıdır. Əczaçılıq sənayesi yaradılmalı, bu sahənin inkişafı üçün müəyyən işlər görülməlidir. Müvafiq strukturlar formalaşandan sonra əczaçılıq sahəsinə nəzarət sistemi yaradılmalıdır".
Günel CƏLİLOVA
