İlqar Orucov: "Təhsilin inkişafına yönələn hər bir sənəd hədəfdə güclü biliklərə əsaslanan, rəqabətə davamlı sənayeni yaratmaqla bərabər, onu idarə edə biləcək insan kapitalını formalaşdırmağa xidmət edir"
Azərbaycanda özəl universitetlərin müstəqilliyinin artırılması və inkişafı üçün stimullaşdırıcı tədbirlər görüləcək. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə deyilir.
Qeyd olunur ki, hazırda Azərbaycanda gənclərin ali təhsillə əhatə olunma səviyyəsi aşağıdır. Bu da uzaq perspektivdə ölkənin rəqabət qabiliyyətli və dayanıqlı inkişafına maneə yarada bilər. Yüksək ixtisaslı kadr hazırlığının əmək bazarının tələbinə və beynəlxalq ixtisas təsnifatına uyğunlaşdırılması, uzunmüddətli proqnozlaşdırma mexanizminin hazırlanması istiqamətində fəaliyyətlər, əmək bazarında differensiallaşmış əməkhaqqı və stimullaşdırma sisteminin yaradılması üzrə mexanizmlərin hazırlanması dəstəklənəcək.
Universitet klasterlərinin yaradılması "təhsil-tədqiqat-innovasiya" zəncirinin effektivliyini artıra bilər. Bu baxımdan ölkədə, ilk növbədə, bəzi ixtisaslaşmış universitetlərdə klasterlərin yaradılması təşviq ediləcək. Ali təhsil sisteminin keyfiyyətinin yüksəldilməsi nəticəsində daha keyfiyyətli insan kapitalı və intellektual potensial formalaşacaq, əmək məhsuldarlığı artacaq.
Ali təhsil haqqında qanunun və dövlət proqramının qəbul edilməsi məsələsi nəzərdən keçiriləcək.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında qeyd etdi ki, Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasının milli iqtisadiyyat perspektivi üzrə Strateji Yol Xəritəsi"ndə özəl universitetlərin müstəqilliyinin artırılması və inkişafı üçün stimullaşdırıcı tədbirlərin görülməsi nəzərdə tutulub: "Əslində, bu məsələdə nəinki özəl, hətta dövlət universitetləri də maraqlı olmalıdır. Dünya inkişaf edir və bu inkişaf olduqca sürətlidir. Bundan sonra inkişafın sürəti daha da artan templə baş verəcək. Ona görə də dünyanın bir hissəsi olaraq Azərbaycan cəmiyyətini irəli aparmaq üçün onun təhsili keyfiyyətli olmalıdır, dünya təhsil sisteminin qabaqcıl təcrübəsini öyrənib tətbiq etməlidir. Və yekunda rəqabətə davamlı əmək bazarının formalaşması prosesini təmin etməlidir. Həqiqət bundan ibarətdir ki, bizim təhsilimiz, xüsusilə ali təhsilimizin səviyyəsi dünyanın qabaqcıl təhsil səviyyəsindən xeyli geri qalır və bundan irəli gələrək kadrlarımızın da rəqabətə davamlılığı lazımı səviyyədə olmur. Dünyada artıq yeni ixtisaslar yaranır, bəzən ayrı-ayrı ixtisasların differensasiyası və bəzən isə inteqrasiyası baş verir. Nüfuzlu ali məktəblər yüksək ixtisaslı kadrların hazırlanması ilə imic olaraq öz nüfuzunu qoruyur və inkişaf etdirir.
Digər tərəfdən, qeyd olunan sənəd özəl universitetlər üçün daha bir yeni imkan yaradır ki, bu da universitet klasterlərinin yaradılmasının təşviqi ilə bağlıdır. Universitet klasterlərinin yaradılması ilə təhsil-tədqiqat-innovasiya arasında əlaqənin formalaşması ilə gənclərimizin yiyələndiyi nəzəri biliklərin praktiki tərəflərinin mənimsənilməsi prosesi sürətlənəcək. Özəl universitetlərin öz elmi-təqiqat laboratoriyaları olmalıdır. Həmçinin, texnoparklar, texnoportlar yaratmalıdırlar. Universitetlər profilinə müvafiq olaraq müxtəlif sənaye qurumları ilə əməkdaşlıq etməli və onların sifarişlərinə uyğun olaraq məhsullar istehsalında biliklər ortaya qoymağı bacarmalıdır. Hətta özəl universitetlər imkanlarının artmasında o qədər maraqlı olmalıdır ki, təhsil ocağının nəzdində yeni texnologiyalara malik zavod və digər sənaye müəssisələri də yarada bilmək mümkün olsun. Universitetin verdiyi bilik iqtisadiyyatla vəhdətdə olmalıdır. Bunun üçün artıq ölkə başçısı səviyyəsində güclü siyasi iradə mövcuddur. Təhsilin inkişafına yönəlmiş hər bir sənəd hədəfdə güclü biliklərə əsaslanmış, rəqabətə davamlı sənayeni yaratmaqla bərabər, onu idarə edə biləcək insan kapitalını formalaşdırmağa xidmət edir".
Günel CƏLİLOVA
