Bahadur Bilalov: "Yeni yaradılacaq qurumun fəaliyyəti turizm sahəsində elmi tədqiqatların aparılmasına yönələcəksə, buna yalnız sevinmək lazımdır"
Azərbaycanda dövlət tərəfindən turizm sahəsində elmi tədqiqatların aparılması üçün qurumlar təsis ediləcək. Bu, yeni hazırlanan "Turizm haqqında" qanun layihəsində nəzərdə tutulub. Layihəyə görə, dövlət turizm sahəsində elmi tədqiqatların aparılması üçün şəxslər müvəkkil edəcək. Dövlət, eyni zamanda, qeyri-dövlət qurumları tərəfindən həyata keçirilən bu cür fəaliyyətə məlumatlandırıcı, maddi-texniki yardım göstərəcək.
Turizm sahəsində elmi tədqiqatların aparılması nə kimi əhəmiyyət daşıyır? Mövzu ilə bağlı fikir bildirən turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, hər bir sahənin inkişafı elmlə bağlıdır. İqtisadiyyat, İKT və ya turizm sahəsində inkişaf əldə olunursa, bu, elmi tədqiqatlar sayəsindədir: "İstənilən sahədə irəli getmək istəyiriksə, o sahə ilə bağlı elmi tədqiqatlar aparılmalıdır. Turizm sahəsi ən gəlirli sahələrdən biri sayılır. Bu sahəyə dövlət tərəfindən də xüsusi diqqət göstərilir".
Həmsöhbətimiz qeyd etdi ki, Azərbaycan Turizm Menecment Universiteti fəaliyyət göstərir. Turizm sahəsində elmi tədqiqatlar bu universitetdə təşkil olunarsa, işin xeyrinə olar.
B.Bilalovun sözlərinə görə, turizmin inkişafı hazırda əsas müzakirə olunan mövzulardan biridir: "Ötən illərlə müqayisədə turizm sahəsində yaxşı mənada dəyişiklik var. Turistlərin ölkəmizə marağı artır. İstər ərəb, istərsə də Avropa ölkələrinin vətəndaşları ölkəmizə maraq göstərir. Turistlərin istirahət üçün Azərbaycanı seçməsi bizi sevindirir. Bu sahənin inkişafı üçün xüsusi bir qurumun yaradılması təqdirəlayiqdir. Həmin qurumun fəaliyyəti turizm sahəsində elmi tədqiqatların aparılmasına yönələcəksə, buna yalnız sevinmək lazımdır".
Günel CƏLİLOVA
