Hər zaman gənclərə dəstək olan "Azercell Telekom" MMC-nin İnsan qaynaqları departamentinin əməkdaşları ABŞ Təhsilli Azərbaycan Məzunları İctimai Birliyi və Amerika Mərkəzinin tələbələr və məzunlar üçün təşkil etdiyi Karyera Günü və İş Yarmarkasında iştirak edib.
Şirkət nümayəndələri "Azercell"də işə qəbul olunmaq arzusunda olan məzunlar üçün informasiya sessiyaları təşkil edib və "Azercell"də mövcud olan vakansiyalar barədə yarmarka iştirakçılarını məlumatlandırıb. İşə qəbul şöbəsinin əməkdaşları "Azercell"də işə qəbul və şirkətin elan etdiyi Tələbə Təqaüdü və Təcrübə proqramları haqqında məlumat verib, eyni zamanda məzunları maraqlandıran sualları cavablandırıb. Tələbələr mövcud əmək bazarında onların ixtisaslarına olan tələbat barədə məlumat əldə etmək, işəgötürənlərlə ilkin əlaqələr qurmaq, həmçinin, işəgötürənlər potensial kadrların seçimini aparmaq imkanı qazanıb. Tədbirin keçirilməsində məqsəd öz bacarıq və biliklərinə uyğun iş axtaran gənclərə məsləhətlər vermək, onlara gələcək karyeralarını qurmaqda yardım etməkdir. Yarmarka zamanı iştirakçılar üçün "Şəxsi iş: şəxsi biznes idarəetmənin çətinlik və perspektivləri", "İş əlaqələri qurma və müsahibə aparma bacarıqları", "Uğurlu karyera qurmaq: Qeyri-kommersiya şirkətlərində işin çətinlik və perspektivləri", "Şəxsi brendinizi necə yaratmalı", "Uğurlu karyera qurmaq: Uğurlu və layiqli karyera qurmanın 10 yolu" və "Karyera planlaşdırılması və həyatdan nə istəyirsiniz" mövzusunda sessiyalar keçirilib. Günün ikinci yarısında tələbə və məzunların müxtəlif yerli və beynəlxalq şirkətlərin nümayəndələri ilə görüşməsi və bu şirkətlərdə işləməyin fayda və imkanları haqqında məlumat verilib.
Qeyd edək ki, "Azercell Telekom" MMC daim istedadlı gənclərə karyera qurmaqda, onlara iş aləmində öz yerini tapmaqda yardımçı olur. Son illər ərzində mütəmadi olaraq "Azercell"in təşəbbüsü ilə şirkət tərəfindən karyera günləri təşkil edilir.
Daha ətraflı məlumat üçün [email protected] ünvanına müraciət edə bilərsiniz.
