Rafiq İsmayıl: "Bölgələrdə çalışanlara da güzəştli ipoteka krediti verilsə, gənclər böyük həvəslə ucqar ərazilərdə çalışmaq istəyəcək"
Azərbaycanda orta məktəb müəllimlərinin güzəştli ipoteka kateqoriyasına daxil edilməsi təklif edilir. Belə bir təkliflə Milli Məclisin iclasında deputat Qənirə Paşayeva çıxış edib.
O bildirib ki, orta məktəb müəllimlərinin əməkhaqları ipotekadan yararlanmağa imkan vermir: "Müəllimlər də həmin güzəştli kateqoriyaya daxil edilsə, onların da ipotekadan yararlanmaq imkanı olacaq. Bu, müəllimlərimizə çox böyük dəstək olar. Savadlı nəsillərin yetişməsi üçün müəllimlərin böyük rolu var. Onlar da ipoteka almaq üçün güzəştli kateqoriyaya daxil edilsin".
Təhsil işçiləri müəllimlərə güzəştli şərtlərlə ipoteka kreditinin verilməsini müsbət dəyərləndirir.
Təshil eksperti Rafiq İsmayıl bizimlə söhbətində bildirdi ki, müəllimlər güzəştli ipoteka kreditindən yararlana bilsə, onların sosial durumu yüngülləşər: "Bəllidir ki, bu gün əksər təhsil işçilərinin sosial durumu ağırdır. Onların bəzisi kirayə mənzillərdə yaşayır. Müəllim maaşı ilə isə ev sahibi olmaq mümkün deyil. Bu danılmaz faktdır. Ancaq müəllimlərə güzəştli şərtlərlə ipoteka krediti verilsə, o zaman pedaqoqlar mənzillə təmin olunar".
Həmsöhbətimizin sözlərinə görə, bu gün bölgələrdə və ucqar rayonlarda yaşayıb dərs deyən müəllimlərin sosial durumu ürəkaçan deyil: "Güzəştli ipoteka krediti bölgələrdə çalışan müəllimlərə də şamil olunsa, o zaman pedaqoqların sosial durumu yaxşı olar. Müəllimin sosial durumu normaldırsa, bu hal onun dərsdemə metodikasına da müsbət təsir edə bilər. Fikri evin, sosial çətinliyin yanında olan pedaqoq məktəblilərə necə yaxşı dərs başa sala bilsin?".
Ekspertin fikrincə, ucqar ərazilərdə çalışan müəllimlərə güzəştli ipoteka krediti verilsə, bu, gənc kadrların bölgələrdə çalışmaq istəyini artıracaq: "Ali məktəbi bitirən gənclər əsasən paytaxt Bakı ərazisində çalışmağa üstünlük verir. Bölgələrdə çalışanlara güzəştli ipoteka krediti verilsə, gənclər böyük həvəslə ucqar ərazilərdə çalışmaq istəyəcək".
Günel CƏLİLOVA
