05-06 dekabr 2016-cı ildə "Polisə Dəstək" İB Masallı Dövlət Regional Kollecinin akt zalında Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyilə "Soyqırım, Dini Radikalizm və Terrorizm təzahürlərinə qarşı təşəbbüslər" mövzusunda rayon polis şöbəsinin müvafiq sahələri üzrə əməkdaşlarının, ictimai şuraların, ictimaiyyətin polislə bərabər çalışan nümayəndələrinin (ictimai polis), Masallı Dövlət Regional kolleci rəhbərliyinin, pedaqoqların və tələbə gənclərin iştirakı ilə geniş seminar-mühazirə keçirib.
Tədbiri giriş sözü ilə açan Masallı Dövlət Regional Kollecinin direktoru Vidadi Nəzərov iştirakçılara Prezident İlham Əliyevin cinayətarlıqla mübarizə siyasətinin formalaşdırılmasında və onların zərərləşdirilməsində gənclərin iştirakını vacib məsələlərdən biri kimi qeyd edərək, terrorizm və dini radikalizm hallarının beynəlxalq aləmdə genişlənməsini insanlığa yönələn və xüsusi amansızlıqla törədilən faktları ağır cinayətlər kateqoriyasına aid edib. Azərbaycanda isə belə əməllərin olmamasını bilavasitə Azərbaycan polisinin, təhlükəsizlik xidməti işçilərinin vətəndaş cəmiyyəti ilə qarşılıqlı, gərgin fəaliyyətlərini, ölkədə kiçik xalqların mədəniyyətlərinə və dinlərinə dövlət tərəfindən göstərilən qayğının canlı təcəssümü olaraq diqqətə çatdırıb.
Sonra məruzə üçün söz "Polisə Dəstək" İB-nin sədri Şəmsəddin Əliyevə verilib. O, seminar iştirakçılarına ölkədə multikultural dəyərlərin dövlətin daxili siyasətinə uyğun tərzdə qorunması və Azərbaycan dövlətinin beynəlxalq aləmdə nüfuzunun artması barədə məlumat verib, terrorizm və dini radikalizm təzahürlərinə qarşı mübarizədə hər bir Azərbaycan vətəndaşının, hər bir kosmopolit-dünya vətəndaşının kənarda qalmamasını, hər kəsin vətənə, xalqa və dövlətə olan sədaqətini nümayiş etdirməsini diqqətə çatdırıb. Qeyd edib ki, bu cinayətlər insanlıq və ictimai təhlükəsizlik əleyhinə, dövlətin siyasi sütunlarına və beynəlxalq təşkilatların fəaliyyətinə yönələn xüsusilə ağır, mütəşəkkil cinayətlər təsnifatına aiddir. Ş.Əliyevin sözlərinə görə, əhali arasında vahimə beynəlxalq aləmdə sülhə təhlükə yaradır:"Soyqırımdan danışılırsa, ilk növbədə erməni işğalçılarının Xocalı, Kəlbəcər, Laçın, Şuşa və digər işğal olunmuş Azərbaycan ərazilərində dinc əhaliyə qarşı qətliamların üzərində dayanmalıyıq. Azərbaycan ziyalısı bu haqda da geniş məlumatlara malik olmalı, onu imkanları daxilində beynəlxalq aləmə çatdırmağı bacarmalıdır".
Sonra layihə ətrafında Kollecin müəllimi Nazim Məmmədov, Dilarə xanım Mürşüdova, tələbələrdən Çingiz Ağayev çıxış edərək fikir və mülahizələrini bildiriblər.
Sonda verilən suallar cavablandırılıb və QHT Şurasının maliyyə dəstəyi ilə çapdan çıxmış "Terrorizm - XXI əsrin müharibəsi" kitabının Masallı Dövlət Regional Kollecində təqdimatı keçirilib.
Xəbəri "Polisə Dəstək" İB-nin mətbuat xidməti yayıb.
Xəbər xidməti
