ABŞ-ın Azərbaycandakı səfirliyindən "Bakı-Xəbər" qəzetinə verilən məlumata görə, bu ilin 9-19 noyabr tarixində Açıq Dünya Liderlik Proqramı (Open World Leadership Program) çərçivəsində vətəndaş hüquqlarını müdafiə edən bir qrup hüquqşünas Amerika Birləşmiş Ştatlarına səfər edib.
Səfər zamanı onlar Oklahoma ştatının Oklahoma şəhərində Amerikanın ədliyyə sistemilə praktiki olaraq tanış olublar. Hüquqşünəslarımız ABŞ-da, həmçinin, ən yaxşı praktikadan faydalanmaq üçün federal və yerli məhkəmələr, Oklahoma Dövlət Vəkillər Assosiasiyası, özəl hüquq firmaları və Oklahoma Universitetinin Hüquq Məktəbinə də baş çəkiblər.
Konqres kitabxanası tərəfindən maliyyələşdirilən bu səfər keçmiş sovet respublikalarından olan gənc liderlərin bir araya gətirilməsinə hədəflənən mübadilə proqramıdır. 1999-cu ildə proqramın icrasına başlanandan bəri səkkiz min iki yüz amerikalı ailə Azərbaycan, Gürcüstan, Qazaxıstan, Qırğızıstan, Moldova, Rusiya, Ukrayna, Tacikistan və Türkmənistandan olan iyirmi beş min qonağı qəbul edib.
Xəbər xidməti
