Məhərrəm Zülfüqarlı: "Doqquzuncu sinfin buraxılış imtahanları ilə bağlı qərar verilərkən təhsil işçilərinin mövqeyi nəzərə alınmalı idi"
Dövlət İmtahan Mərkəzinin Direktorlar Şurasının (DİM) sədri Məleykə Abbaszadə 9 illik orta təhsil üzrə buraxılış imtahanının yeni modelinə dair açıqlama verib.
O, 2017-ci ildə 9 illik təhsil bazasından buraxılış imtahanlarının yeni qaydaları haqda məlumat verərək bildirib ki, 9-cu sinifdə oxuyan şagirdlər ötən 9 il ərzində yeni proqram əsasında təhsil alır. 2008-ci ildən başlayaraq artıq 9 ildir respublikanın ümumtəhsil müəssisələrində yeni təhsil proqramları (kurrikulumlar) tətbiq olunur və yeni məzmun standartlarına uyğun hazırlanmış dərsliklərdən istifadə edilir: "Birinci sinifdən onlara kurrikulum tətbiq olunub. Biz onların bilik və bacarığını qiymətləndirmək üçün yeni metodlar hazırlamışıq və onların buraxılış imtahanları 2 mərhələdə keçiriləcək".
M.Abbaszadə bildirib ki, 2016/2017-ci tədris ilində ümumi orta təhsil (9-cu sinif) səviyyəsi üzrə təhsil alanların biliyinin yekun qiymətləndirilməsi (attestasiyası) yeni qaydalar əsasında həyata keçiriləcək. Buraxılış imtahanı DİM tərəfindən mərkəzləşdirilmiş qaydada Azərbaycan bölməsinin şagirdləri üçün Azərbaycan dili, rus bölməsinin şagirdləri üçün rus dili və hər iki bölmə üzrə riyaziyyat fənnindən ibarət olmaqla, iki mərhələdə keçiriləcək.
M.Abbaszadənin açıqlamasından belə məlum olur ki, 9-cu sinfi bitərənlər yalnız Azərbaycan dili və riyaziyyatdan imtahan verəcək. Halbuki, buraxılaş imtahanının bu iki fənlə məhdudlaşması birmənalı qarşılanmır.
Məsələyə münasibət bildirən təhsil eksperti Məhərrəm Zülfüqarlı da hesab edir ki, 9-cu sinifdə buraxılış imtahanlarının yalnız Azərbaycan dili və riyaziyyatdan olması yetərli deyil: "Əlbəttə, bu variantı o qədər də məqbul saymaq olmaz. Ona görə ki, şagirdlərin bilikləri təkcə sözügedən fənlərlə ölçülmür. Digər fənlərin də imtahana salınmasına ehtiyac var. Onlardan biri də Azərbaycan tarixi fənnidir. Hesab edirəm ki, sözügedən fənnin imtahana salınması daha vacibdir. Sözügedən məsələ elədir ki, gərək bununla bağlı qərar verəndə bütün məqamları nəzərə alasan. Doqquzuncu sinfin buraxılış imtahanları ilə bağlı qərar verilərkən təhsil işçilərinin mövqeyi nəzərə alınmalı idi. Çox təəssüf ki, belə olmadı. O üzdən, məsələyə yenidən baxmaq olar. Təki bununla bağlı istək olsun".
Vidadi ORDAHALLI
