Aytəkin Kamranqızı: "Musiqi məktəblərinin maliyyələşdirilməsi həm dövlət büdcəsi, həm də vətəndaşların hesabına ola bilər"
Azərbaycanda uşaq bağçalarında müştərək maliyyələşmə mexanizmi tətbiq oluna bilər.
Bu sözləri maliyyə naziri Samir Şərifov bəyan edib ki, bəzi xərclərin dövlətlə əhali arasında bölüşdürülməsi prosesinin düzgün, səmərəli həyata keçirilməsi ictimai nəzarətin tətbiqinə gətirib çıxarır: "Böyük maliyyə vəsaitlərini cəlb etmək imkanına malik qurumlarda korporativ idarəetmə standartları tətbiq olunmalıdır. Biz artıq bazar iqtisadiyyatına keçmişik. Dövlət üzərinə sosial yükü götürüb. Bu da ölkə Prezidentinin apardığı siyasətdir. Sosialyönümlü siyasət üstünlük təşkil edəcək. Hazırda pullu və dövlət büdcəsi hesabına maliyyələşən bağçalar var. Burada müştərək maliyyələşmə prinsipləri tətbiq oluna bilər". S.Şərifov bildirib ki, musiqi məktəblərinin müştərək maliyyələşmə prinsiplərinə də baxıla bilər: "Mədəniyyət və Turizm Nazirliyi ilə məsləhətləşmələrə başlamışıq. Musiqi məktəblərində də müştərək maliyyələşmə prinsipləri tətbiq oluna bilər. Bir hissəsi dövlət və bir hissəsi maraqlı valideynlər tərəfindən ola bilər. Valideyn maraqlıdırsa ki, uşaq bu sahədə oxusun, yəqin ki, cüzi də olsa, bu prosesdə iştirak etməlidir".
Məsələ ilə bağlı fikir bildirən sosioloq Aytəkin Kamranqızı bizimlə söhbətində qeyd etdi ki, əksər inkişaf etmiş ölkələrdə məktəbəqədər təhsil müəssisələri valideynlər hesabına formalaşdırılır: "Bir sıra ölkələrdə ailə tipli bağçalar var. Həmin bağçalar valideynlərin hesabına maliyyələşir. Bir neçə ailə birləşərək övladları üçün bağça yaradır. Valideynlərin seçdiyi tərbiyəçilər onların övladlarına nəzarət edir. Bu bağçaların özəl bağçalardan fərqi odur ki, onlardan daha kiçikdir və bir neçə ailənin uşağı üçün fəaliyyət göstərir".
Musiqi məktəblərinin maliyyələşdirilməsinə gəlincə, həmsöhbətimiz qeyd etdi ki, bu həm dövlət büdcəsi, həm də vətəndaşların hesabına ola bilər: "Musiqi məktəblərində musiqi sahəsinin bütün sahələri tədris olunmur. Valideyn istəyir ki, onun övladı hansısa musiqi alətini çalmağı öyrənsin. Ancaq həmin məktəbdə o alətdən istifadə tədris olunmur. Belə olan şəraitdə valideynlər istədiyi musiqi fənninin tədrisi üçün özləri maliyyə ayırmaqda maraqlı olmalıdır".
Günel CƏLİLOVA
