Şəmsəddin Əliyev: "Bununla bağlı polisə əlavə səlahiyyətlərin verilməsi torpaqların qanunsuz zəbt olunması hallarının qarşısını alacaq"
Prezident İlham Əliyev Azərbaycan Respublikası Prezidentinin 2000-ci il 28 noyabr tarixli, 421 nömrəli Fərmanı ilə təsdiq edilmiş "Torpaqlardan istifadəyə və onların mühafizəsinə dövlət nəzarəti haqqında Əsasnamə"də dəyişiklik edilməsi barədə Fərman imzalayıb. Belə ki, "Torpaqlardan istifadəyə və onların mühafizəsinə dövlət nəzarəti haqqında Əsasnamə"nin 9.5-ci yarımbəndi aşağıdakı redaksiyada verilir:
"9.5. Torpaq sahələrinin özbaşına tutulması (zəbt edilməsi) hallarının qarşısının alınması üçün tədbir görülməsini, bu hallar barədə Azərbaycan Respublikasının daxili işlər orqanlarına məlumat verilməsini təmin edir;".
Görünən odur ki, son vaxtlar torpaqların təyinatı ilə bağlı qanunvericiliyin tələblərinin qorunması istiqamətində tədbirlər gücləndirilib. Bütün ölkə üzrə torpaqların özbaşına zəbt olunması, qanunsuz tikintilərin aparılması, təyinatına zidd istifadə və torpaq sahələri barədə qanunsuz qərarların verilməsi məsələləri ilə mübarizə güclənir. Reallıq ondan ibarətdir ki, kənd təsərrüfatlı torpaqlarda qanunsuz yaşayış evi və ya digər obyektlərin tikintisi, torpaqların təyinatının qanunsuz dəyişdirilməsi, dövlət torpaqlarının zəbt olunması kimi hallar var. Belə qanunsuz hərəkətlər nəticəsində kənd təsərrüfatı təyinatlı torpaqların sahəsi azalır, torpağın məqsədli istifadəsinə maneələr ortaya çıxır, qanunsuz tikililərin sayı artır. Bu baxımdan Prezidentin son fərmanı və bununla bağlı polisə əlavə səlahiyyətlərin verilməsini ekspertlər necə dəyərləndirir? Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, bununla bağlı polisə əlavə səlahiyyətlərin verilməsi bu sahədə neqativ halların azalmasına müsbət təsir edəcək: "Belə bir qərarın verilməsini bir sıra faktorlar şərtləndirir. Məsələ ondadır ki, tarixən cinayətkarlıqla mübarizə deyəndə ilk anlama daxili işlər orqanları gəlir. İstər yanğın hallarında, istər torpaqların qanunsuz zəbtində və digər bu kimi hallarda yada ilk polis düşür. Ta əvvəllər polisin ştat vahidi az olsa belə, polis çevik reaksiya ilə bütün bu sahələri tənzimləməyi bacarırdı. Mübarizə aparmaq üçün kifayət qədər peşəkarlıq ənənəsi vardı. Zaman sübut etdi ki, bir sıra məsələlər, yəni hüquqpozmalar polisin imkanlarından kənarda olduğundan, digər orqanın səlahiyyəti çərçivəsində olduğundan, vaxtında həll olunmur. Ona görə də dövlət başçısı kifayət qədər çevik reaksiya verdi. Hesab edirəm ki, bununla bağlı polisə əlavə səlahiyyətlərin verilməsi torpaqların qanunsuz zəbt olunması hallarının qarşısını alacaq. Fikrimcə, bunun arzuolunan səviyyədə səmərəsi olacaq". Vidadi ORDAHALLI
