"Nar" "BakuTel-2016" 22-ci beynəlxalq "Telekommunikasiya və informasiya texnologiyaları" sərgisində iştirak edir. Mobil operator, hər il olduğu kimi, bu il də özünün ən son yeniliklərini geniş ictimaiyyətin diqqətinə çatdırır.
Sərgi günlərində "Nar" stendinin ziyarətçiləri Azərbaycanda ilk dəfə olaraq ölkə coğrafiyasında virtual səyahət etmək imkanı verən və virtual reallıq texnologiyasına əsaslanan "Augmented Reality" interaktiv turunun birbaşa iştirakçısı olmaq fürsəti qazanır. Virtual reallıq texnologiyası əsasında hazırlanmış proqram təminatı bölgələrdə yaşayan Azərbaycan vətəndaşları üçün mobil operator tərəfindən xüsusi olaraq təqdim edilmiş yeni "Yerlim" tarifinin tanıdılması çərçivəsində hazırlanıb.
Qeyd edək ki, "Nar" operatoru "BakuTel-2016" sərgisi çərçivəsində ilk yerli məzmuna əsaslanan və yerli şirkət tərəfindən ərsəyə gətirilən virtual reallıq texnologiyasını təqdim edib. İstifadəçilər xüsusi avadanlıq vasitəsilə Azərbaycanın bölgələrinə virtual səyahət edə bilir. Görüntü üçölçülü olmaqla yanaşı, həm də 360 dərəcəlik baxış imkanı yaradır. Üstəlik, istifadəçilər sadəcə şəkil deyil, həm də interaktiv səyahətin iştirakçısına çevrilir. Bölgələrə virtual səyahət edən qonaqlara "Nar" tərəfindən xüsusi olaraq Azərbaycanın müxtəlif bölgələri üçün yaradılan və abunəçilərə yaşadıqları bölgələrdə dəqiqəsi cəmi 1 qəpiyə danışmaq imkanı verən "Yerlim" tariflər toplusu barədə məlumat verilir.
Bundan əlavə, "Nar" stendinin ziyarətçiləri müxtəlif interaktiv əyləncəli oyun və yarışların iştirakçısı olur. Bu müsabiqələrin qalibləri müxtəlif dəyərli hədiyyələrlə mükafatlandırılır.
Xatırladaq ki, Bakı Ekspo Mərkəzində keçirilən "BakuTel-2016" sərgisində iştirak edən "Nar" sərgi müddətində müasir rabitə tələblərinin vahid ödəniş üzərindən təqdim edilməsini nəzərdə tutan tamamilə yeni "Qutu" məhsulunu, yüksək sürətli məlumat mübadiləsini təmin edən LTE-A (LTE-Advanced) şəbəkəsini, "Augmented Reality" virtual reallıq texnologiyasını və digər yeniliklərini təqdim edir. "Nar" müasir texnologiyalara biganə olmayan hər bir kəsi özünün "BakuTel" stendinə dəvət edir.
