Ölkəmizdə Prezident İlham Əliyev tərəfindən idmana göstərilən qayğı göz qabağındadır. İdman respublikamızın əsas sahəsinə dönüb.
Müstəqil Azərbaycanımız bütün dünyada idman ölkəsi kimi tanınır, adı hörmətlə çəkilir. İdmançılarımız Dünya, Avropa çempionatların müxtəlif yarışlarında qələbə qazanaraq bayrağımızı bayraqlar içində ucaldırlar. İndi elə bir idman növü yoxdur ki, beynəlxalq səviyyəli yarışlarda Azərbaycanın adı orada birincilər sırasında çəkilməsin. Birinci Avropa Oyunlarının Bakıda keçirilməsi bir daha Azərbaycan idmanının yüksələn şöhrətini göstərdi. Müstəqilliyimizin cəmi 25 yaşı olsa da, sanki idmançılarımız öz oyun tərzi ilə yüzillik bir yol gəliblər. Onların çıxışlarına baxanda, istər-istəməz, adam yalnız qürur hissi keçirir. Prezident İlham Əliyev qələbədən sonra idmançılarla görüşəndə daha möhtəşəm görünür.
Uğurlara baxmayaraq, hər növ idmanın inkişafı üçün yeni-yeni tədbirlər görülür. İndi elə rayon mərkəzi yoxdur ki, orada olimpiya kompleksi idmançıların ixtiyarına verilməsin. Təəssüf ki, idmanda görülən möhtəşəm işlər bəzi kənd yerlərində hiss olunmur. Deməyim odur ki, idmanla məşğul olmaq istəsən də, adi idman qurğusu belə yoxdur. Sovet dağılanı kənd yerlərində sanki idman tarixə döndü. Daster və Tülü-Conu ərazisini 14 kənd birləşdirir, buralarda idman çoxdan unudulub.
Mən özüm uzun müddət idman sahəsində çalışmışam. Lerik rayonundakı keçmiş "Mədəniyyət" kolxozunda istehsalat gimnastikası metodisti olmuşam. O vaxtlar kənd yerlərində də özünəməxsus idman ənənələri var idi. Adamların ən çox sevdiyi yer idman meydançaları olardı. Tez-tez müxtəlif yarışlar keçirilir və kənddə onun inkişafına dövlət tərəfindən böyük təkan verilirdi. İndi qayğı olmadığı kimi, yarışlardan da əsər-əlamət qalmayıb.
Sevindirici haldır ki, respublikamızda idman potensialı ildən-ilə güclənir, dünya səviyyəli idmançılar yetişir . Şəhərlərdə çoxlu idman qurğuları tikilir. Artıq kənd yerlərində də bu vacibdir və həllini gözləyən ən böyük problemdir. Adamların sağlamlığı təkcə şəxsin özünün deyil, həm də vətənin böyük sərvətidir. Elə sərvət ki, onu heç nə ilə əvəz etmək olmaz. Həm də belə problemlərə görə gənclər şəhərə meyl edir, doğma ata ocağından uzaqlaşır.
Zəfər ORUCOĞLU, Azərbaycan Jurnalistlər Birliyinin üzvü, "Qızıl qələm", "Xalqın nüfuzlu ziyalısı" mükafatçısı (Lerik rayonu).
