Vaqif Qarayev: "Abşeron torpağı, başqa regionlara nisbətən, parazitlərlə zəngindir, qurd xəstəliyinin çox yayılmasının bir səbəbi də budur"
Azərbaycanda uşaqlarda ən çox yayılan xəstəliklər açıqlanıb. Tibbi müayinədən keçən uşaqlar arasında ən çox tənəffüs sistemi xəstəlikləri və qurd invaziyaları (helmintoz) aşkarlanır.
Bunu Səhiyyə Nazirliyinin baş pediatrı, K.Fərəcova adına Elmi-Tədqiqat Pediatriya İnstitutunun direktoru Nəsib Quliyev "Uşaqların icbari dispanserizasiyadan keçirilməsinə dair Dövlət Proqramı"nın icrasının yekunlarına həsr olunmuş tədbirdə deyib. Onun sözlərinə görə, bu xəstəliklər əsasən məktəbəqədər və məktəbyaşlı uşaqlar arasında özünü büruzə verir: "Qurda yoluxma halı ən çox məktəbəqədər yaş dövründə rast gəlinir. Çünki həmin yaşda olan uşaqlar hərəkətdə daha çox olur. Buna görə də gigiyenik tələblərə riayət edilmir. Lakin tənəffüs üzvlərinin xəstəlikləri daha kiçikyaşlı uşaqlarda çox tez-tez rast gəlinir. Bu da uşaq orqanizminin anatomik-fizioloji xüsusiyyətləri ilə izah olunur".
Uşaqlarda ən çox aşkar olunan tənəffüs sistemi və qurd xəstəliklərindən qorunmağın yolları barədə pediatr Vaqif Qarayevlə söhbət etdik. O, "Bakı-Xəbər"ə açıqlamasında qeyd etdi ki, kiçik yaşlı uşaqlarda tənəffüs sistemi xəstəliklərinə daha çox rast gəlinir: "Bu xəstəliklər, demək olar ki, bütün dünyada qeydə alınır. Səbəbi həm tənəffüs orqanlarının anatomik-fizioloji xüsusiyyətləri, həm də körpə uşaqların xəstəliklərə qarşı müqavimətinin zəif olması ilə bağlıdır. Adi virus infeksiyası körpələrdə ciddi fəsadlar yaradır və bəzən ölüm halları da qaçılmaz olur. Ona görə də valideynlər həkimə vaxtında müraciət etməlidir. Valideynin özü müalicə ilə məşğul olmamalıdır".
Qurd xəstəliklərinin artmasına gəldikdə isə, həmsöhbətimiz bildirdi ki, buna səbəb gigiyenik qaydalara düzgün əməl olunmamasıdır: "Uşaq tək yatmalıdır. Uşağın torpaqla təması kəsilməlidir. Qurd xəstəliyinə qarşı müalicə axıra kimi aparılmalıdır. Mən sizə deyim ki, bir kursla sağalmaq mümkün deyil. Bizdə Abşeron torpağı, başqa regionlara nisbətən, parazitlərlə zəngindir. Qurd xəstəliyinin çox yayılmasının bir səbəbi də budur".
Günel CƏLİLOVA
