Aytəkin Kamranqızı: "Erkən nikah və qız uşaqlarının təhsildən yayınması, uşaqlara qarşı zorakılıq hallarının aradan qaldırılması aktual məsələlərdən biridir"
Uşaq hüquqları insan hüquqlarının tərkib hissəsi kimi bu gün dünya ictimaiyyətini düşündürən əsas məsələlərdən biridir. Bu məsələ təkcə regional deyil, həm də beynəlxalq xarakter daşıyır.
Ona görə ki, müasir dünyada həyatın bütün sahələrində uşaqların hüquqları müxtəlif şəraitlərdə pozulur, onlar fiziki, psixoloji və cinsi təzyiqlərə məruz qalır. Uşaq hüquqlarının qorunması məsələsi 2017-ci ilin sosial-iqtisadi inkişaf konsepsiyasında yer alıb.
Layihənin "4.5.11. Ailə, qadın və uşaq siyasətinin əsas istiqamətləri" adlanan hissəsində göstərilib ki, Azərbaycanda Uşaq Məcəlləsi hazırlanaraq qəbul olunacaq.
Yeni layihəyə görə, 2017-2022-ci illər üçün "Gender bərabərliyi üzrə Milli Fəaliyyət Planı" da hazırlanacaq.
Konsepsiya layihəsinin ailə, qadın və uşaq siyasəti istiqamətinə uyğun olaraq, xüsusilə regionlarda olmaqla, zorakılıq qurbanı olan qadınlar üçün 24/7 rejimdə çalışan "qaynar xətt" də yaradılacaq.
Layihə Milli Məclisə daxil olub və parlamentin qarşıdakı iclaslarında müzakirə olunacaq.
Sosioloq Aytəkin Kamranqızı qəzetimizə açıqlamasında qeyd etdi ki, Azərbaycanda uşaq hüquqlarının müdafiəsi sahəsində məqsədyönlü işlər aparılır, onların hərtərəfli şəxsiyyət və layiqli vətəndaş kimi formalaşması, təhsil alması və cəmiyyətdə mövqe tutması daim ön plandadır: "Uşaq hüquqlarının qorunması üçün Uşaq Məcəlləsinin hazırlanıb qəbul olunması uzun müddət gözlənilirdi. Həmin məcəllədə uşaq hüquqlarının hansı hallarda pozulması əks olunacaq. Yaxşı olar ki, uşaq sahəsində mövcud problemlərdən ən aktualı hesab edilən erkən nikah problemi də qeyd olunsun. Bəllidir ki, bu gün bəzi bölgələrdə qızlar hələ yetkinlik yaşına qədəm qoymadan ərə verilir. Erkən nikah və qız uşaqlarının təhsildən yayınması, uşaqlara qarşı zorakılıq hallarının aradan qaldırılması aktual məsələlərdən biridir. Unutmaq lazım deyil ki, məişət zorakılığının qurbanı da elə məhz uşaqlardır. O uşaqların gələcək həyata adaptasiya olunması məqsədilə onlar üçün xüsusi psixoloji mərkəzlər yaradılmalıdır".
Günel CƏLİLOVA
