25-26 noyabr 2016-cı ildə "Polisə Dəstək" İB Lənkəran Dövlət Universitetinin akt zalında Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə "Dini radikalizm və Terrorizmə qarşı təşəbbüslər" mövzusunda Masallı və Lənkəran polis şöbələrinin müvafiq sahələri üzrə əməkdaşlarının, ictimai şuraların ictimaiyyətin polislə bərabər çalışdığı nümayəndələrin (ictimai polis), Lənkəran Dövlət Universitetinin pedaqoji heyəti və tələbələrinin, Gənclər Təşkilatının üzvlərinin iştirakı ilə geniş seminar-mühazirə keçirilib.
Tədbiri giriş sözü ilə açan Lənkəran Dövlət Universitetinin prorektoru Yədulla Ağazadə terrorizm və dini radikalizmə qarşı mübarizədə gənclərin iştirakını vəzifə kimi diqqətə çatdıraraq, təhlükəsiz bir cəmiyyətin davamlı olmasında hər bir vətəndaşın ayıq-sayıq olmasının gərəkliyini vurğulayıb.
Sonra layihə ətrafında "Polisə Dəstək" İB-nin sədri Şəmsəddin Əliyev iştirakçılara geniş məlumat verib, əhali arasında vahimə və beynəlxalq aləmdə sülhə təhlükə yaradan, ümumilikdə insanlıq əleyhinə olan xüsusilə ağır və amansızlığı ilə seçilən bu cinayətləri doğuran səbəb və şəraitdən, onların qarşısını almaq üçün vətəndaşların seyrçi mövqedən uzaqlaşaraq yaxından iştirakının vacibliyindən danışıb. "Azərbaycan dövlətinin Terrorizmə, Dini Radikalizmə və Soyqırıma qarşı" mübarizə siyasətinin formalaşdırılmasında, onun həyata keçirilməsində biz vətəndaşların iştirakı çox vacibdir. Son zamanlar Suriya və İraqdan sıxışdırılan "Əl-Qaidə" şəbəkəsinin özünə yeni, dinc məkan axtarışı, Azərbaycanın rayonlarından müxtəlif təriqətli şübhəli şəxslərin paytaxt Bakıya axını və bunun ölkədəki sabitliyin pozulmasına təsirinə qarşı çıxmağı hamımız konstitusion borc kimi qəbul etməliyik!" - deyə Ş.Əliyev məruzəsinə yekun vurub.
Sonra Lənkəran Rayon Polis Şöbəsinin əməkdaşı, polis mayoru Kəmaləddin Adıgözəlov, Masallı RPŞ-nin əməkdaşı, polis mayoru Rəhim İbrahimov, Lənkəran Dövlət Universitetinin dosenti, riyaziyyat üzrə fəlsəfə doktoru İdrak Əhmədov mövzu ilə bağlı çıxış edərək hüquqi dövlətin, vətəndaş cəmiyyətinin mərkəzi fiquru kimi hər bir fərdin bu istiqamətdə bacarığını əsirgəməməsini diqqətə çatdırıb.
Sonda verilən suallar cavablandırılıb və QHT Şurasının maliyyə dəstəyilə çapdan çıxmış "Terrorizm - XXI əsrin müharibəsi" kitabının Lənkəran Dövlət Univeritetində təqdimatı keçirilib, layihə üzrə müzakirənin gənclər üçün faydalı olacağına ümid ifadə olunub.
Xəbəri "Polisə Dəstək" İB-nin mətbuat xidməti yayıb.
Xəbər xidməti
