Rasif Bağırov: "Yaradılan ambulator poliklinikalar müasir tibbi avadanlıqlarla təmin olunsa, əhali özəl xəstəxanalara deyil, dövlət tibb müəssisələrinə üz tutar"
Milli Məclisə təqdim olunmuş "Azərbaycanın 2017-ci il və gələn üç il üzrə sosial-iqtisadi inkişaf konsepsiyası"nın layihəsində qeyd olunub ki, ambulator-poliklinika yardımı göstərən müəssisələrin sayı artırılacaq.
Layihəyə görə, ölkədə xəstəxanaların sayı və onların çarpayı fondu optimallaşdırılacaq. Bütün ölkə üzrə səhiyyə sahəsində coğrafi məlumat sistemi yaradılacaq.
Layihədə qeyd edilir ki, səhiyyə formalarının idarə olunmasının mərkəzləşdirilmiş və mərkəzləşdirilməmiş formaları müəyyən ediləcək. Bundan başqa, ilkin səhiyyə səviyyəsində göstərilən xidmətlərin həcmi genişləndiriləcək.
Ambulator-poliklinikaların sayının artırılması barədə fikir bildirən həkim Vaqif Qarayev "Bakı-Xəbər"ə açıqlamasında qeyd etdi ki, praktik təbabətin ilkin zənciri ailə həkimi, poliklinikalar və təcili yardımdır: "Bütün dünyada praktik təbabət deyəndə qeyd etdiklərim yada düşür. Xəstə günün istənilən saatında səhhətində yaranan problemin aradan qaldırılması məqsədilə həkim tapa bilməlidir. Amma bunun üçün adıçəkilən qurumlarda ambulator xidmət üçün hər cür şərait olmalıdır. Ancaq bu gün bizim poliklinikalarda şərait, demək olar ki, yoxdur, avadanlıqlar köhnədir, günün tələbləri ilə uzlaşmır. Bu səbəbdən də insanlar özəl xəstəxanalara müraciət etmək məcburuyyətindədir. Bu isə vaxt, əsəb, əlavə maliyyə vəsaiti deməkdir".
Həkim-ekspert Rasif Bağırov isə hesab edir ki, poliklinikaların yaradılması ölkədə özəl klinikaların sayına təsir edə bilər: "Poliklinikaların sayının artırılması yaxşı ideyadır. Yaxşı olar ki, yeni yaradılan poliklinikalar müasir tibbi cihazlarla təmin olunsun. Bəllidir ki, bu gün poliklinikaların, demək olar ki, əksəriyyəti tibbi avadanlıqlarla təmin olunmayıb. Olunsa da, onların istifadə müddəti çoxdan bitib. Yeni yaradılan ambulator poliklinikalar müasir tibbi avadanlıqlarla təmin olunsa, əhali özəl xəstəxanalara deyil, dövlət tibb müəssisələrinə üz tutar".
Günel CƏLİLOVA
