İlqar Orucov: "Arzu edərdim ki, bu islahatlar gələcəkdə orta məktəbi bitirən məzunların təkrar qəbul imtahanları vermədən, attestat qiymətlərinə müvafiq olaraq, ali məktəblərə qəbul olunmasına şərait yaratsın"
Xəbər verildiyi kimi, IX sinfi bitirənlərə şəhadətnamə verilməsi proseduru ləğv edilib. Yeni Qaydaya əsasən, ümumi orta təhsil səviyyəsini xüsusi nailiyyətlərlə başa vuran məzunlara ümumi orta təhsil haqqında fərqlənmə attestatı, digər hallarda isə ümumi orta təhsil haqqında adi attestat veriləcək.
Nazirlər Kabineti "Ümumi təhsil pilləsində təhsil haqqında dövlət sənədlərinin nümunələri və onların verilməsi Qaydası"nı yeni redaksiyada təsdiq edib.
Yeni Qaydaya əsasən, tam orta təhsil səviyyəsini qızıl və ya gümüş medalla təltif olunmaqla başa vuran məzunlara tam orta təhsil haqqında xüsusi nümunəli attestat, əla qiymətlərlə başa vuran məzunlara tam orta təhsil haqqında fərqlənmə attestatı, digər hallarda isə tam orta təhsil haqqında adi attestat veriləcək. Eyni zamanda tam orta təhsil haqqında attestatda "Təhsil aldığı təmayül" qrafasında şagirdin bitirdiyi sinfin təmayül istiqaməti yazılacaq. Seçilmiş təmayüllər üzrə təsdiq edilmiş tədris planlarında nəzərdə tutulmayan digər fənlərdən tam orta təhsil haqqında attestata ümumi orta təhsil səviyyəsində həmin fənlərdən tədris olunan saatların ümumi miqdarı və təhsilalanın bu fənlərdən yekun attestasiya nəticələri (illik) yazılacaq.
Qeyd edək ki, attestatların ölçüləri və təsviri də dəyişib. Yeni Qaydaya əsasən, ümumi orta təhsil haqqında attestat 12.5 x 17 sm ölçüdə, üz qabığı dermantin materialdan olan kitabça şəklində çap olunacaq. Ümumi orta təhsil haqqında fərqlənmə attestatının üzlüyü qırmızı, adi attestatın üzlüyü isə yaşıl rənglidir.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında qeyd etdi ki, Nazirlər Kabinetinin 2010-cu il 29 aprel tarixli Qərarı ilə qüvvəyə minmiş "Ümumi təhsil pilləsində təhsil haqqında dövlət sənədlərinin nümunələri və onların verilməsi Qaydası"na dəyişiklik olunub: "Yəni cəmiyyətdə guya orta məktəbin 9-cu sinfini bitirən məzunlara şəhadətnamə verilməyəcək kimi səslənən ifadənin mahiyyətində dayanan odur ki, bu məzunlara şəhadətnamə yox, attestat veriləcək. Yəni burada dəyişiklik yalnız şəhadətnamə adının attestat adı ilə əvəzlənməsini ehtiva edir. Digər yeniliyə görə, ümumi orta təhsil səviyyəsini xüsusi nailiyyətlərlə başa vuran məzunlara ümumi orta təhsil haqqında fərqlənmə attestatı, digər hallarda isə ümumi orta təhsil haqqında adi attestat veriləcək. Dəyişiklik təkcə 9-cu sinfi bitirən məzunları deyil, tam orta təhsilini başa vuran məzunları da əhatə edir. Belə ki, indiyə qədər tam orta təhsil səviyyəsini xüsusi fərqlənmə ilə (qızıl və ya gümüş medalla təltif olunmaqla) başa vuran məzunlara tam orta təhsil haqqında xüsusi nümunəli attestat verilirdi. Digər hallarda isə tam orta təhsil haqqında adi attestat verilirdi. Yeni Qaydaya əsasən, tam orta təhsil səviyyəsini qızıl və ya gümüş medalla təltif olunmaqla başa vuran məzunlara tam orta təhsil haqqında xüsusi nümunəli attestat, əla qiymətlərlə başa vuran məzunlara tam orta təhsil haqqında fərqlənmə attestatı, digər hallarda isə tam orta təhsil haqqında adi attestat veriləcək. Eyni zamanda tam orta təhsil haqqında attestatda "Təhsil aldığı təmayül" qrafasında şagirdin bitirdiyi sinfin təmayül istiqaməti yazılacaq. Seçilmiş təmayüllər üzrə təsdiq edilmiş tədris planlarında nəzərdə tutulmayan digər fənlərdən tam orta təhsil haqqında attestata ümumi orta təhsil səviyyəsində həmin fənlərdən tədris olunan saatların ümumi miqdarı və təhsilalanın bu fənlərdən yekun attestasiya nəticələri (illik) yazılacaq.
Yəni qeyd olunanlar narahatedici heç nəyin olmadığını göstərir. Bu dəyişikliklər təhsil sisteminindəki yeniliklərin və islahatların davamıdır. Arzu edərdim ki, bu islahatlar gələcəkdə orta məktəbi bitirən məzunların təkrar qəbul imtahanları vermədən, attestat qiymətlərinə müvafiq olaraq, ali məktəblərə qəbul olunmasına şərait yaradacaq prosesin başlanğıcı olsun".
Günel CƏLİLOVA
