Adil Qeybulla: "Dərmanların satış qiymətinin tənzimlənməsi bazar iqtisadiyyatının prinsiplərinə ziddir"
Prezident İlham Əliyev "Dərman vasitələri haqqında" Azərbaycan Respublikasının Qanununda dəyişikliklər edilməsi barədə" 2016-cı il 14 oktyabr tarixli Qanunun tətbiqi haqqında Fərman imzalayıb. Sənədə əsasən, dövlət qeydiyyatına alınmış dərman vasitələrinin qiymətləri tənzimlənmədən satışı və ya tənzimlənən qiymətlərdən fərqli qiymətlərlə satılması (dövlət satınalmaları zamanı və ya tibb müəssisələrinə təklif edilən topdansatış qiymətlərdən aşağı qiymətlər istisna olmaqla) qadağan edilir.
Fərmana görə, dərman vasitələrinin istehsalçıları, xarici istehsalçıların yerli nümayəndəlikləri (filialları) və ya onların müvəkkil etdikləri şəxslər dövlət qeydiyyatına alınmış dərman vasitələrinin qiymətlərinin tənzimlənməsi məqsədilə bəyannamələri, hesabat sənədlərini və zəruri məlumatları müvafiq icra hakimiyyəti orqanına təqdim etməyə borcludur.
Dərmanların fərqli qiymətə satışının qadağan olunması barədə fikir bildirən həkim-ekspert Rasif Bağırov "Bakı-Xəbər"ə açıqlamasında qeyd etdi ki, bu qərar əhalinin xeyrinə olacaq: "Artıq insanlar onlara lazım olan preparatı almaq üçün müxtəlif aptekləri gəzməyəcək. Bəlli idi ki, bu günə kimi eyni adlı preparat apteklərdə müxtəlif qiymətə satılırdı. Alıcı qiymət fərqini görüb həmin dərmanın keyfiyyətindən şübhə edirdi". Həmsöhbətimiz onu da əlavə etdi ki, dərmanların satış qiymətinin standart olması dərman bazarına mənfi təsir göstərəcək: "Depoya yaxın və ondan uzaqda olan aptekdə satılan preparatların qiymətlərində mütləq fərq olmalıdır. Şəhərin mərkəzində fəaliyyət göstərən depodan preparat alıb uzaq məsafəyə aparan şirkət dərmanı eyni qiymətə sata bilməz. Belə olan halda, bəzi dərmanların qıtlığı müşahidə olunacaq. Şirkətlər müəyyən səbəblərdən dərmanların satış qiyməti ilə razı olmadığına görə bazara çıxarmayacaq. Belə olan halda, çarəsiz vəziyyətdə qalan həkim xəstənin şəfa tapması üçün ona əvəzedici dərman məsləhət görəcək. Əvəzedicilər də lazımi səviyyədə effekt vermir.
Dərman bazarında sərbəst fəaliyyətə sağlam nəzarət olarsa, preparatların satış qiyməti əhalinin cibinə uyğun olar".
Tibb sahəsi üzrə ekspert, professor Adil Qeybulla qəzetimizə açıqlamasında qeyd etdi ki, dərmanların satış qiymətinin tənzimlənməsi bazar iqtisadiyyatının prinsiplərinə ziddir: "Aptek şəbəkələrinin, demək olar ki, əksəriyyəti icarədir. Mərkəzdə olan aptekin icarə haqqı ilə kənar ərazilərdə fəaliyyət göstərən əczaxanaların icarə haqqı eyni olmur. Bu qərar kənar ərazilərdə olan apteklər üçün çətinlik törədəcək. Əvvəllər apteklər arasında rəqabət var idi. Artıq rəqabət olmayacaq".
Günel CƏLİLOVA
