Bahadur Bilalov: "Naxçıvanda turizmin inkişaf etməsinin əsas səbəblərindən biri də orada tarixi abidələrin olmasıdır"
Hazırda ən gəlirli sahələrdən biri turizm sayılır. Turizm artıq bütün dünyada sürətlə inkişaf edən iqtisadi sektora çevrilib. Ölkəmizin coğrafi cəhətdən əlverişli mövqedə yerləşməsi, böyük dövlət dəstəyinin olması, infrastrukturun təkmilləşdirilməsi turizm sahəsinin inkişafını şərtləndirən amillərdəndir.
Ölkəyə istirahət üçün gələn turistlər adətən əlverişli coğrafi mövqeyə malik əraziləri seçir.
Bəllidir ki, bu il ölkəmizə gələn turistlərin sayı ötən illərlə müqayisədə yüksək oldu. Bu fərqi istənilən şəxs müşahidə edib. Turistlər istirahət üçün tək paytaxt Bakı şəhərinə deyil, ölkəmizin digər bölgələrinə də üz tutub. Bu siyahıda bir sıra bölgələrin adını çəkmək olar. Ancaq Naxçıvana yollanan turistlərin sayı digər bölgələrlə müqayisədə üstünlük təşkil edir.
Açıqlanan statistik rəqəmlərə əsasən, yanvar-oktyabr aylarında Naxçıvan Muxtar Respublikasına 328 min 213 turist gəlib. Dövlət Statistika Komitəsinin yaydığı məlumatda qeyd olunur ki, bu göstərici 2015-ci ilin müvafiq dövründəki saydan 4,8 faiz və ya 15137 nəfər çoxdur.
Naxçıvana səfər edən turistlərin sayının artmasında qəribə heç nə yoxdur. Çünki bu bölgənin əlverişli coğrafi mövqedə yerləşməsi, əhalinin qonaqpərvər olması, tarixi abidələrlə zənginliyi və digər əlamətlər turistlərin marağını cəlb edir.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, Naxçıvan Azərbaycanın elə bölgələrindəndir ki, turistlərin ora maraq göstərməsi təbiidir: "Naxçıvanda həm sağlamlıq, həm də istirahət üçün gözəl məkanlar mövcuddur. Orada "Duzdağ" adlı sanatoriyanın olması əcnəbilərlə yanaşı, yerli vətəndaşların da diqqətini çəkir. Sanatoriyanın yaxınlığında "Duzdağ" adlı 5 ulduzlu otel fəaliyyət göstərir. Eyni zamanda, Culfa rayonu ərazisində Darıdağ termal suyunun ətrafında sanatoriya fəaliyyət göstərir. Həmin sanatoriyaya həm ölkədaxili, həm də xarici turistlər gəlir".
Həmsöhbətimiz onu da əlavə etdi ki, Naxçıvanda turizmin inkişaf etməsinin əsas səbəblərindən biri də orada tarixi abidələrin olmasıdır. Adıçəkilən bölgədə dini turizm də inkişaf edib: "Əshabu-kəhf" ziyarətgahına dünyanın müxtəlif yerlərindən gəlirlər. Qədim inancları, möcüzəvi sirləri və əfsanələri özündə yaşadan "Əshabi-Kəhf" Dini-Mədəni Abidə Kompleksi dünyanın dörd bir yanından gələn zəvvarların ziyarətgahına çevrilib. Bu mənada dini turizmin inkişafı istiqamətində görülən işlər, dini-mədəni abidələrin bərpası və qorunması, təşkil olunan turizm marşrutları mədəni irsimizin dünyaya tanıdılmasında vasitə rolunu oynayır".
B.Bilalovun sözlərinə görə, Naxçıvanın təbiətinin çox maraqlı olması insanların diqqətini cəlb edir: "Son zamanlar Naxçıvan doğrudan da çox gözəlləşib. Şəhər abadlaşır və küçələrin təmizliyi istənilən insanın diqqətini cəlb edir. Naxçıvanda respublika səviyyəsində keçirilən tədbirlər ora gedənlərin sayının artmasına təsir edir".
Günel CƏLİLOVA
