Yusif Bəkirov: "İcma, ailə və bələdiyyə bağçalarının yaradılması ilə məktəbəqədər təhsil müəssisələri arasında rəqabət yaranacaq"
Azərbaycanda yeni tip bağçalar - icma, ailə, bələdiyyə bağçaları yaradılacaq. Bu barədə Milli Məclisə təqdim olunmuş "Azərbaycanın 2017-ci il və gələn üç il üzrə iqtisadi-sosial inkişaf konsepsiyası"nin layihəsində qeyd olunub.
Layihəyə görə, ölkə üzrə azyaşlı uşaqların məktəbəqədər təhsilə cəlb olunma səviyyəsinin orta Avropa göstəricisi səviyyəsinə çatdırılması məqsədilə dövlət uşaq bağçaları şəbəkəsi genişləndiriləcək, onların şərait və təchizatı yaxşılaşdırılacaq.
Bununla yanaşı, ölkədə mülkiyyət formasına görə bələdiyyə, icma, özəl, ailə bağçaları tipli məktəbəqədər təhsil müəssisələri yaradılacaq. Qeyd edək ki, hazırda Azərbaycanda dövlət və özəl məktəbəqədər təhsil müəssisələri fəaliyyət göstərir.
Layihəyə əsasən, məktəbəqədər təhsilin əhalinin bütün təbəqələri üçün əlçatan olması məqsədilə müxtəlif formaların, o cümlədən qısamüddətli, ailə tipli (icma əsaslı) təhsil xidmətlərinin tətbiqi nəzərdə tutulur.
Layihəyə məktəbəqədər təhsil müəssisələri şəbəkəsinin optimallaşdırılması məsələsi də daxil edilib.
Mövzu barədə fikir bildirən uşaq hüquqları üzrə ekspert Yusif Bəkirov "Bakı-Xəbər"ə açıqlamasında qeyd etdi ki, bu tipli bağçaların yaradılmasını müsbət dəyərləndirir: "Ailə bağçalarının yaradılması ideyası yaxşıdır. Əksər Avropa ölkələrində ailə bağçaları mövcuddur. Hər bir dövlət bağçaya gedən uşağa aylıq 100 manat dəyərində pul ayırır. Ailə tipli bağça o deməkdir ki, bir məhəllədə təxminən 5-6 uşaq olur. Həmin uşaqlara baxmaq üçün bir şəxs seçilir. Seçilən insana dövlət tərəfindən pul ayrılır. Uşaqlara nəzarət edən şəxs dövlət tərəfindən aylıq məvacib almaqla uşaqlara baxacaq. Xarici ölkələrdə ailə bağçaları geniş yayılıb. Ailə bağçalarının yaradılması, bir növ, valideynlərin rahatlığını təmin edəcək.
Bələdiyyə bağçaları isə, adından bəlli olduğu kimi, bələdiyyələrin nəzdində olacaq.
İcma bağçaları isə rayon və kənd yerlərində olur. Əksər rayonlarda müəyyən birliklər fəaliyyət göstərir. Həmin birliklərin nəzdində icma bağçaları yaradılacaq. İcma bağçalarına daha çox məcburi köçkünlər, sosial durumu zəif olan ailələrin övladları yollanacaq. Bu bağçalarda çalışan nəzarətçilərə də əməkhaqqı dövlət tərəfindən veriləcək. İcma bağçalarının yaradılmasını müsbət dəyərləndirirəm".
Həmsöhbətimiz hesab edir ki, icma, ailə və bələdiyyə bağçalarının yaradılması ilə məktəbəqədər təhsil müəssisələri arasında rəqabət yaranacaq: "Sadəcə, bu bağçaların yaradılması çoxlu maliyyə tələb edəcək. Bəllidir ki, hazırda bağçalar icra hakimiyyətinin nəzdindədir. Yeni yaradılması gözlənən bağçalara hansı qurum tərəfindən nəzarət olunacağı sual doğurur".
Günel CƏLİLOVA
