Oqtay Haqverdiyev: "Reklam qurğularının xarici dildə olması, bir növ, cəlbedici funksiya daşıyacaq"
Azərbaycanda xarici dildə reklama icazə veriləcək. Ölkədə reklam qurğularında və materiallarında dövlət dilindən başqa digər dillərdən də istifadəyə icazə verilir, bununla bağlı şərtlər müəyyənləşdirilir.
Milli Məclisin yaydığı məlumata görə, bununla bağlı "Azərbaycan Respublikasının dövlət dili haqqında" Qanuna 7.1-1-ci maddənin əlavə edilməsi təklif olunur. Layihəyə əsasən, reklamvericinin tələbinə əsasən, reklam qurğularında yerləşdirilən reklamın mətnində Azərbaycan Respublikasının dövlət dili ilə yanaşı, digər dillərdən istifadə oluna bilər. Bu halda xarici dildə olan mətn dövlət dilində olan mətndən sonra yerləşdirilməli, dövlət dilində olan mətnin tutduğu sahədən kiçik olmalı və reklamın yerləşdiyi ümumi sahənin üçdə birindən çox olmamalıdır. Mətndə digər dillərdə ifadə olunan əmtəə nişanı və coğrafi göstərici müvafiq icra hakimiyyəti orqanı tərəfindən qeydə alındığı formada göstərilir.
Qeyd edək ki, layihə Milli Məclisin plenar iclasına tövsiyə olunub və noyabrın 29-da müzakirəyə çıxarılacaq.
Reklam mətnlərinin xarici dildə yayılmasına icazə verilməsinin reklam biznesinə və iqtisadiyyata nə kimi təsiri olacaq?
Bəllidir ki, artıq ölkəmizə müxtəlif ölkələrdən turistlər gəlir. Turistlər hər hansı bir obyektdən istifadə etmək istədikdə həmin məkanın təyinatı ilə maraqlanır. Müvafiq məlumat aldıqda isə turistlərin dükanlardan alış-veriş etmək istəyi artır. Təbii, bu hal ölkə büdcəsinə gəlir gətirəcək və turistlərin sayını da artıracaq.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, reklamın əcnəbi dildə olması turistlərin sayını artıra bilər: "Turist sayının artması isə ölkə iqtisadiyyatına müsbət təsir edir. Əcnəbi turist Bakı küçələrində gəzərkən ingilis və ya hansısa əcnəbi dildə yazılan dükanın adını görür və dərhal həmin obyektdən özünə lazım olanı alır. Bu hal ilk növbədə büdcəmizə gəlir gətirəcək. Reklamın xarici dildə olmasının digər müsbət tərəfi isə turist axınına təsir etməsidir. Ölkəsinə qayıdan turist Azərbaycanda gördüyü məkanların və ya brend dükanların adını rahatca öz yaxınlarına anladacaq. Belə olan halda, həmin şəxslər Azərbaycana gəlmək istəyəcək".
Həmsöhbətimiz reklam mətnlərinin xarici dildə yayılmasının tərəfdarı olduğunu dilə gətirdi.
İqtisadçı-ekspert Oqtay Haqverdiyev bizimlə söhbətində bildirdi ki, reklam qurğularının xarici dildə olması, bir növ, cəlbedici funksiya daşıyacaq.
İqtisadçı bəzi məhsulların adının əcnəbi, bəzilərinin xarici dildə yazılmasının tərəfdarı olduğunu dilə gətirdi: "Məsələn, brend əşyaların satıldığı məkanın adı əcnəbi dildə yazılmalıdır ki, ölkəyə gələn turist həmin obyektdə satılanların brend olmasından xəbərdar olsun. Ancaq kiçik iaşə obyektlərinin adının xarici dildə yazılmasına ehtiyac yoxdur".
Günel CƏLİLOVA
