Eyyub Hüseynov: "Qablaşdırılan süni uşaq qidalarının üzərində böyük hərflərlə "ana südü əvəzolunmazdır", "körpələrinizi ana südü ilə qidalandırın" kimi ifadələr yazılmalıdır"
Azərbaycanda süni qida məhsullarının hamilə qadınlar və analar arasında, tibb müəssisələrində reklamı qadağan edilir. Bununla bağlı "Körpələrin və erkən yaşlı uşaqların qidalanması haqqında" Qanunda dəyişiklik edilir.
Yalnız sertifikatlaşdırılma barədə sənədləri olduqda, süni qida məhsulları reklam edilə bilər. Bu halda reklamda sertifikatın nömrəsi, verilmə tarixi və onu verən orqanın adı göstərilməlidir. Məhsulların reklamında onlardan istifadənin yaş məhdudiyyətləri haqqında məlumat verilməli, mütəxəssislərlə məsləhətləşmənin zəruriliyi, ana südünün üstünlüyü qeyd olunmalıdır. Süni qida məhsullarının reklamının açıq məkanda yerləşdirilməsi qadağandır.
Reklamın sifarişçisi reklam istehsalçısının və reklam yayıcısının tələbi ilə həmin məhsulların uyğunluq, gigiyenik və mənşə sertifikatının, istifadəsinə dair təlimatın, bu təlimatda dərman vasitəsinin buraxılması qaydası göstərilmədiyi hallarda müvafiq məlumat olan sənədin, reklamda istinad olduqda, tədqiqatların nəticəsini təsdiq edən sənədin surətini təqdim edir.
Qeyd edək ki, layihə Milli Məclisin noyabrın 29-da keçiriləcək plenar iclasında müzakirəyə çıxarılacaq.
Süni uşaq qidalarının reklamının qadağan olunması həm pediatrlar, həm də valideynlər tərəfindən müsbət qarşılanır.
Azad İstehlakçılar Birliyinin (AİB) rəhbəri Eyyub Hüseynov "Bakı-Xəbər"ə açıqlamasında süni uşaq qidalarının reklamının qadağan olunmasının tərəfdarı olduğunu dilə gətirdi.
Onun sözlərinə görə, Ümumdünya Səhiyyə Təşkilatının kodeksinə əsasən, uşaqlar ana südü ilə qidalanmalıdır. Həmçinin, ölkə qanunvericiliyində də körpələrin ana südü ilə qidalanması qeyd olunur: "Azad İstehlakçılar Birliyi ana südü ilə əmizdirməyə dair beynəlxalq təşkilatın üzvüdür. Qanunvericilikdə qeyd olunur ki, qablaşdırılan süni uşaq qidalarının üzərində böyük hərflərlə "ana südü əvəzolunmazdır", "körpələrinizi ana südü ilə qidalandırın" kimi ifadələr yazılmalıdır".
Birlik sədri bildirdi ki, uşaq qidalarının satış qiyməti olduqca bahadır. Uşaq qidalarının qiymətinin baha olmasının səbəbi isə şirkətlərin pediatrlarla birgə fəaliyyət göstərməsidir: "Pediatrlar həmin şirkətlərdən müəyyən məbləğdə haqq alır. Həmin o məbləğ də süni uşaq qidalarının üzərinə əlavə olunur.
"Fresko" adlı uşaq qidasının üçüncü ölkədən gətirildiyi barədə Birliyə məlumat daxil olub. Erkən yaşlı körpələrin qidalanması haqqında qanunda birmənalı olaraq bildirilir ki, uşaq qidalarının üçüncü ölkədən Azərbaycana idxalı qadağandır".
Həmsöhbətimizin dediyinə görə, analar doğum evindən çıxarkən valideynə uşaq qidaları ilə bağlı müxtəlif zənglər gəlir: "Bu o deməkdir ki, pediatrlar, qanuna zidd olaraq, süni qida distribüterləri ilə əlbirdir. Bu olayların qarşısını almaq lazımdır".
Günel CƏLİLOVA
