Məlahət Mürşüdlü: "IX sinif buraxılış imtahanından aşağı qiymət alan məzunların təhsilə marağını artırmaq üçün yeni formalar tətbiq etmək lazımdır"
"Buraxılış imtahanlarının nəticələrinə əsasən, bütün ölkə üzrə nəticələr IX siniflə müqayisədə XI sinifdə daha yaxşıdır. Uşaqların səviyyəsinin yaxşı olması üçün tədris prosesi I-IX siniflərdə düzgün qurulmalıdır". Bunu Dövlət İmtahan Mərkəzinin Direktorlar Şurasının sədri Məleykə Abbaszadə Lənkəranda keçirilən seminarda deyib.
Onun sözlərinə görə, IX sinfi bitirən və buraxılış imtahanında "2" və "3" qiyməti alan uşaqların 30 %-i sonradan məktəbi atır, X-XI sinifdə oxumur. M.Abbaszadə qeyd edib ki, X-XI sinifdə tədris prosesi yalnız məktəbdə yox, məktəbdən kənarda da keçilir: "Hər bir məktəbdə IX sinfə kimi orta nəticə 30 % olarsa, XI sinifdə bu göstərici 40-45 % olur. IX sinifdə əldə olunan nəticə XI sinifdə 10-20 % arasında artır. Bu isə o deməkdir ki, IX sinfə kimi şagirdin bünövrəsi necədirsə, sonradan valideyn nə etsə də, nə qədər yaxşı müəllimlərə hazırlığa qoysa da, nəticələrə maksimum 20 % təsir etmək mümkün olur".
IX sinfi kafi qiymətlə bitirən şagirdlərin təhsilini davam etdirməsi üçün nə etmək lazımdır?
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, IX sinif buraxılış imtahanından aşağı qiymət alan məzunların təhsilə marağını artırmaq üçün yeni formalar tətbiq etmək lazımdır: "O uşaqların təhsilə qayıtması üçün yeni strukturlar mövcuddur. Həmin uşaqlar peşə, axşam məktəblərinə yazılmaqla, həm təhsillərini davam etdirər, həm də peşə öyrənər. Bu tədris ocaqları həmin uşaqlara orta məktəbi bitirmək haqqında attestat vermək hüququna malikdir".
Həmsöhbətimizin sözlərinə görə, IX sinfi kafi qiymətlə bitirən məzunların bir qismi təhsildən yayınır. Bu danılmaz faktdır. O uşaqlara təhsilini davam etdirmək üçün dəstək vermək lazımdır: "Bu iş ilk növbədə onların üzərinə düşür, daha sonra isə müəllim heyətinin. IX sinfi kafi qiymətlə bitirən məzunlara başa salmaq lazımdır ki, onlar gələcəkdə təhsilini davam etdirmədiyinə görə peşmançılıq hissi keçirəcək. Bu hissi yaşamaması üçün onlar X-XI sinfi oxumaqla bu müddətdə nəsə bir şey öyrənə bilər. Onlar təhsilini davam etdirmək istəmirsə, peşə təhsilinə yönləndirilməlidir".
Günel CƏLİLOVA
